မြန်မာ-တရုတ်ခရီးသွားလုပ်ငန်း စတင်လုပ်ကိုင်လိုသူများအား အကူအညီပေးသွားမည်

မြန်မာနှင့် တရုတ် နှစ်နိုင်ငံအကြား ခရီးသွားလုပ်ငန်း စတင်လုပ်ကိုင်လိုသည့် အေဂျင်စီများအား လိုအပ်သော အဆက်အသွယ်များ ချိတ်ဆက်ပေးသွားမည်ဖြစ်ကြောင်း ရန်ကုန်တရုတ်ယဉ်ကျေးမှုစင်တာမှ သိရသည်။ ဇန်နဝါရီလ ၁၃ ရက်က ရန်ကုန်မြို့၌ ကျင်းပခဲ့သော "China Winter Tourism Promotion & Seminar" ပွဲတွင် စင်တာ၏ တာဝန်ရှိသူတစ်ဦးက ပြောကြားခဲ့ခြင်းဖြစ်ပြီး၊ ခရီးသွားအေဂျင်စီအချင်းချင်း သတင်းအချက်အလက်ဖလှယ်ရန်နှင့် မြန်မာနိုင်ငံသားများနှင့် ကိုက်ညီမည့် ခရီးစဉ်များ ရေးဆွဲရာတွင် အထောက်အကူဖြစ်စေရန် ရည်ရွယ်ခြင်းဖြစ်သည်။ အဆိုပါပွဲတွင် တရုတ်ဗီဇာမူဝါဒများနှင့် ဆောင်းရာသီခရီးစဉ်များကို မိတ်ဆက်ခဲ့ပြီး လက်ရှိတွင် မြန်မာခရီးသွားများအနေဖြင့် ချုံချင့် (Chongqing) ခရီးစဉ်ကို စိတ်ဝင်စားမှု အများဆုံးရှိနေကြောင်း သိရသည်။ ယခုအခါ မြန်မာနှင့် တရုတ်အကြား တိုက်ရိုက်လေကြောင်းလိုင်း ၈ လိုင်း ပျံသန်းနေပြီး ခရီးလှည့်လည်ရေးကုမ္ပဏီ ၅၂ ခုက ဝန်ဆောင်မှုပေးလျက်ရှိပါသည်။