Bangkok Mass Transit System (BTS) ဟာ Rabbit Card တွေကို ထိုင်းတောင်ပိုင်း Pattani၊ Yala နဲ့ Narathiwat ပြည်နယ်တွေက နိုင်ငံရေးသမားတွေအပြင် မြန်မာ၊ မြောက်ကိုရီးယားနဲ့ အီရန်လို နိုင်ငံတွေက လူတွေကို သုံးခွင့်ပိတ်ပင်ထားတယ်ဆိုတဲ့ အွန်လိုင်းက ပြောဆိုမှုတွေနဲ့ ပတ်သက်ပြီး စနေနေ့ (ဇန်နဝါရီလ ၃ ရက်)မှာ ရှင်းလင်းချက် ထုတ်ပြန်ခဲ့ပါတယ်။ ဒီရှင်းလင်းချက်ဟာ Movement Party ခေါင်းဆောင် Kannavee Suebsang က လူမှုကွန်ရက်ပေါ်မှာ မေးခွန်းထုတ်ပြီးနောက်မှာ ထွက်ပေါ်လာတာ ဖြစ်ပါတယ်။BTS အနေနဲ့ ခရီးသည်အားလုံးကို နိုင်ငံတကာစံချိန်စံညွှန်းနဲ့အညီ တန်းတူညီမျှ ဘေးကင်းစွာ ဝန်ဆောင်မှုပေးနေပြီး ဘယ်သူ့ကိုမှ ခွဲခြားဆက်ဆံတဲ့ မူဝါဒမရှိဘူးလို့ ပြောပါတယ်။ Rabbit Card ဟာ အီလက်ထရောနစ်ငွေကြေး (e-money) ဝန်ဆောင်မှုအောက်မှာ အကျုံးဝင်တဲ့အတွက် သက်ဆိုင်ရာ ဥပဒေတွေအရ သုံးစွဲသူဘယ်သူလဲဆိုတာ အတည်ပြုတဲ့ (KYC) စည်းမျဉ်းတွေကို မဖြစ်မနေ လိုက်နာရမယ်လို့ ဆိုပါတယ်။ဥပဒေအရ သတ်မှတ်ထားတဲ့ စွန့်စားရနိုင်ခြေရှိတဲ့ အုပ်စုဝင်တချို့ (high-risk assessment criteria) ကတော့ ဥပဒေလုပ်ထုံးလုပ်နည်းတွေနဲ့အညီ Phaya Thai ဘူတာမှာရှိတဲ့ Rabbit Service Centre မှာ ထပ်ဆောင်း အတည်ပြုမှုတွေ လုပ်ဖို့ လိုအပ်နိုင်တယ်လို့ ဆိုပါတယ်။အဆင်မပြေမှုတွေ မဖြစ်ရအောင်နဲ့ ကတ်အသုံးပြုခွင့် ဆိုင်းငံ့မခံရအောင် အချက်အလက်တွေကို ကြိုတင်ပြင်ဆင်ထားဖို့လည်း ကုမ္ပဏီက အကြံပြုထားပါတယ်။ ဒီအစီအမံတွေဟာ ဥပဒေကို လိုက်နာဆောင်ရွက်ခြင်းသာဖြစ်ပြီး ခွဲခြားဆက်ဆံတာ မဟုတ်ဘူးလို့ BTS က အလေးအနက် ပြောကြားခဲ့ပါတယ်။
