ရန်ကုန်မြို့တွင် ထူးထူးခြားခြား နှင်းမြူများ ဝေဆိုင်းပြီး ဆောင်းအငွေ့အသက် ပြင်းထန်နေ

၂၀၂၆ ခုနှစ်၊ နှစ်သစ်ကူးကာလ၏ ဒုတိယမြောက်နေ့ဖြစ်သော ယနေ့ (ဇန်နဝါရီ ၂ ရက်) နံနက်ပိုင်းတွင် ရန်ကုန်မြို့တစ်ခွင်၌ ထူးထူးခြားခြား နှင်းမြူများ ပိတ်ဆို့ဝေဆိုင်းနေပြီး လွမ်းမောဖွယ်ရာ ဆောင်းနံနက်ခင်းအလှနှင့်အတူ အအေးဓာတ်ပိုမိုကဲလျက်ရှိကြောင်း သိရသည်။ယနေ့နံနက်အစောပိုင်းမှစ၍ ရန်ကုန်မြို့ရှိ မြို့နယ်အတော်များများတွင် မြင်ကွင်းများ ဝေဝါးသွားသည်အထိ နှင်းမြူများ ထူထပ်စွာကျဆင်းခဲ့ခြင်းဖြစ်ပြီး၊ လမ်းမကြီးများပေါ်တွင် မော်တော်ယာဉ်မောင်းနှင်သူများအနေဖြင့် အန္တရာယ်ကင်းစေရန် မီးများဖွင့်၍ သတိထားမောင်းနှင်ခဲ့ကြရသည်။ မြို့ပြနေပြည်သူများသည်လည်း ရန်ကုန်တွင် ကြုံတောင့်ကြုံခဲဖြစ်သော ဤနှင်းမြူအလှနှင့် ဆောင်း၏အငွေ့အသက်ကို တစ်ဝကြီးခံစားခဲ့ကြရကာ အမှတ်တရဓာတ်ပုံရိုက်ကူးခြင်းနှင့် လူမှုကွန်ရက်စာမျက်နှာများပေါ်တွင် မျှဝေခြင်းများဖြင့် စည်ကားခဲ့သည်။