မလေးရှား နီလိုင်မြို့ရှိ တရားမဝင်ဖျော်ဖြေရေးစင်တာကို ဝင်ရောက်စီးနင်းရာ မြန်မာနိုင်ငံသား ၂၀ ဦး ဖမ်းဆီးခံရ

မလေးရှားနိုင်ငံ၊ Negeri Sembilan ပြည်နယ်၊ နီလိုင်မြို့ရှိ တရားမဝင်ဖွင့်လှစ်ထားသော ဖျော်ဖြေရေးစင်တာတစ်ခုကို ၂၀၂၆ ခုနှစ်၊ ဇန်နဝါရီလ ၁ ရက် နံနက်အစောပိုင်းတွင် ရဲတပ်ဖွဲ့က ဝင်ရောက်စီးနင်းခဲ့ရာ အသက် ၂၀ မှ ၄၀ ကြားရှိ မြန်မာနိုင်ငံသား အမျိုးသမီး ၁၄ ဦးအပါအဝင် စုစုပေါင်း ၂၀ ဦး ဖမ်းဆီးခံခဲ့ရသည်။ အဆိုပါစင်တာသည် ယခင်က ချိပ်ပိတ်ခံထားရဖူးသော်လည်း လွန်ခဲ့သည့်တစ်လခန့်က တရားမဝင်ပြန်လည်ဖွင့်လှစ်ကာ ပတ်ဝန်းကျင်ရှိ နိုင်ငံခြားသားများကို ပစ်မှတ်ထား၍ တစ်ရက်လျှင် ရင်းဂစ် ၄၀၀ မှ ၆၀၀ ခန့်အထိ အမြတ်အစွန်းရအောင် လုပ်ကိုင်နေခြင်းဖြစ်သည်။ ဖမ်းဆီးခံရသူများမှာ ခိုင်လုံသော အထောက်အထား (ID) ပြသနိုင်ခြင်းမရှိသဖြင့် နီလိုင်ခရိုင်ရဲစခန်းတွင် ထိန်းသိမ်းခံထားရပြီး လုပ်ငန်းသုံးအီလက်ထရွန်နစ်ပစ္စည်းများနှင့် ငွေသားများကိုလည်း ရဲတပ်ဖွဲ့က သိမ်းဆည်းခဲ့သည်။ မလေးရှားအာဏာပိုင်များသည် တရားမဝင်လုပ်သားနှင့် လုပ်ငန်းများကို တင်းကြပ်စွာနှိမ်နင်းလျက်ရှိရာ ၂၀၂၅ ခုနှစ်အတွင်း မြန်မာနိုင်ငံသား တစ်သောင်းခန့် ဖမ်းဆီးခံခဲ့ရကြောင်း လူဝင်မှုကြီးကြပ်ရေးဌာန၏ ထုတ်ပြန်ချက်အရ သိရှိရပါသည်။