ပြည်သူ့ရင်ပြင် MSME ဈေးရောင်းပွဲတော်တွင် စားအုန်းဆီ ပိဿာချိန် ၃၅,၀၀၀ သက်သာသောဈေးဖြင့် ရောင်းချပေးနေ

ရန်ကုန်မြို့၊ ပြည်သူ့ရင်ပြင်၌ ကျင်းပလျက်ရှိသော (၇၈) နှစ်မြောက် လွတ်လပ်ရေးနေ့အထိမ်းအမှတ် MSME ဈေးရောင်းပွဲတော်ကာလအတွင်း စားအုန်းဆီ ပိဿာချိန် စုစုပေါင်း ၃၅,၀၀၀ ကို ရောင်းချပေးသွားမည်ဖြစ်ကြောင်း မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းမှ သိရသည်။ အဆိုပါပွဲတော်ကို ဒီဇင်ဘာ ၃၁ ရက်မှ ဇန်နဝါရီ ၄ ရက်အထိ ကျင်းပနေခြင်းဖြစ်ပြီး ရန်ကုန်တိုင်းဒေသကြီးအစိုးရအဖွဲ့၏ ညွှန်ကြားချက်အရ တစ်ရက်လျှင် ပိဿာချိန် ၇,၀၀၀ နှုန်းဖြင့် လူတစ်ဦးကို ၂ ပိဿာခွဲပါ ဆီနှစ်ဘူးအား တစ်ဘူးလျှင် ၁၉,၅၀၀ ကျပ် (ဘူးဖိုးအပါအဝင်) ဖြင့် ရောင်းချပေးနေခြင်းဖြစ်သည်။ ပွဲတော်အတွင်း စားအုန်းဆီကို ဈေးနှုန်းသက်သာစွာ ဝယ်ယူနိုင်ရုံသာမက စတုဒိသာကျွေးမွေးခြင်းနှင့် တေးဂီတဖျော်ဖြေပွဲများပါ ထည့်သွင်းကျင်းပနေသဖြင့် ဇန်နဝါရီ ၁ ရက်နေ့ ညပိုင်းတွင် လာရောက်သူပြည်သူများဖြင့် အထူးစည်ကားခဲ့ကြောင်း သိရှိရပါသည်။