ဂျပန်အဝေးပြေးလမ်းပေါ်တွင် ကားအစီး ၅၀ ဆင့်ကဲတိုက်မိပြီး မီးလောင်မှုဖြစ်ပွား၊ ၂ ဦးသေဆုံးကာ ၂၆ ဦး ဒဏ်ရာရ

ဂျပန်နိုင်ငံအလယ်ပိုင်းရှိ အဝေးပြေးလမ်းမကြီးတစ်ခုပေါ်တွင် ဒီဇင်ဘာလ ၂၈ ရက်က ယာဉ်အစီးရေ ၅၀ ခန့် ဆင့်ကဲတိုက်မိသည့် ကြောက်မက်ဖွယ်ရာ ယာဉ်တိုက်မှုကြီးဖြစ်ပွားခဲ့ရာ လူ ၂ ဦး သေဆုံးပြီး ၂၆ ဦးထက်မနည်း ဒဏ်ရာရရှိခဲ့ကြောင်း ဂျပန်ရဲတပ်ဖွဲ့က အတည်ပြုခဲ့သည်။ ဖြစ်စဉ်မှာ ထရပ်ကားနှစ်စီး စတင်တိုက်မိရာမှ နောက်တွင်ပါလာသော ကားများက အရှိန်မထိန်းနိုင်ဘဲ တစ်စီးနှင့်တစ်စီး ထပ်ဆင့်တိုက်မိခြင်းဖြစ်ပြီး၊ ယင်းနောက် ပေါက်ကွဲမီးလောင်မှုများပါ ဆက်တိုက်ဖြစ်ပွားခဲ့သည်။ အဆိုပါဖြစ်စဉ်ကြောင့် တိုကျိုမြို့မှ အသက် ၇၇ နှစ်အရွယ် အမျိုးသမီးတစ်ဦးနှင့် မီးလောင်နေသော ထရပ်ကားအတွင်းမှ နောက်ထပ် လူတစ်ဦးတို့ သေဆုံးခဲ့ရပြီး၊ ဒဏ်ရာရသူ ၂၆ ဦးအနက် ၅ ဦးမှာ ဒဏ်ရာပြင်းထန်ကြောင်း သိရသည်။ မျက်မြင်သက်သေတစ်ဦး၏ အဆိုအရ ယာဉ်တန်း၏ နောက်ဘက်မှ ကျယ်လောင်သော ပေါက်ကွဲသံကြီးကြားရပြီးနောက် မီးကူးစက်လောင်ကျွမ်းခဲ့ခြင်းဖြစ်ကြောင်း NHK သတင်းဌာနသို့ ပြောကြားခဲ့သည်။