လာမည့် ၂၀၂၆ခု၊ နှစ်သစ်ကူးကာလအတွက် ပြင်ဦးလွင်ရှိ ဟိုတယ်၊ အဆင့်မြင့်တည်းခိုခန်းများတွင် ကြိုတင်ဘွတ်ကင် ပြည့်လုနီးပါးရှိနေ

၂၀၂၆ခု၊ နှစ်သစ်ကူး(Happy New Year) ကာလတွင် လာရောက်လည်ပတ်အပန်းဖြေမည့်သူများကြောင့် ပြင်ဦးလွင်ရှိ ဟိုတယ်၊မိုတယ်၊ အဆင့်မြင့်တည်းခိုခန်းများ၌ ကြိုတင်ဘွတ်ကင်များ ပြည့်လုနီးပါးအထိရှိနေကြောင်း သိရသည်။ယခုအချိန်သည် ပြင်ဦးလွင် အမျိုးသားကန်တော်ကြီးဥယျာဉ်၌ ၁၈ကြိမ်မြောက် ပန်းပွဲတော်နှင့် ပွဲကောက်ရေတံခွန်အပန်းဖြေစခန်းတွင် ဒုတိယအကြိမ်မြောက် ပန်းပွဲတော်တို့ ကျင်းပနေချိန်ဖြစ်ပြီး အားလပ်ရက်များနှင့် ရုံးပိတ်ရက်များတွင် လာရောက်လည်ပတ်သူဦးရေမှာ များပြားလွန်းသဖြင့် မန္တလေး-ပြင်ဦးလွင်လမ်းပိုင်းတချို့၌ ယာဉ်ကြောပိတ်ဆို့မှုများလည်း ဖြစ်ပေါ်လျက်ရှိပါသည်။ပွဲကောက်ရေတံခွန်အပန်းဖြေစခန်း၏ ပန်းပွဲတော်ကိုလည်း ယခင်နှစ်နှင့်မတူ တမူထူးခြားစွာ ဆန်းသစ်သည့် ပန်းပြကွက်ပုံစံများကို နိုင်ငံခြား ပန်းမျိုးစိတ်ပေါင်း (၃၀)ကျော်၊ ပန်းပင်ပေါင်း (၁၇၀,၀၀၀) ကျော်နှင့် အလှဆင်စိုက်ပျိုးပြသထားသည်ဟု သိရပါသည်။