ထိုင်းနိုင်ငံ၏ ဒုတိယ ရဲမင်းကြီး ရဲဗိုလ်ချုပ်ကြီး ဆမ်ရန် နွဲလ်မာ ဦးဆောင်သော တစ်နိုင်ငံလုံး အတိုင်းအတာဖြင့် ကျယ်ပြန့်သည့် ‘OPERATION BAD GUYS OUT’ စစ်ဆင်ရေးကို ဒီဇင်ဘာလ ၂၀ ရက်နေ့တွင် ဆင်နွှဲခဲ့ကြောင်း သိရသည်။နိုင်ငံတဝှမ်းရှိ တရားမဝင် ရွှေ့ပြောင်းနေထိုင်သူများကို ပစ်မှတ်ထားသည့် ဤစစ်ဆင်ရေးတွင် နေရာ ၁၄၄ ခုကျော်ကို ရှာဖွေစစ်ဆေးခဲ့ပြီး ထိုင်းတော်ဝင်ရဲတပ်ဖွဲ့၊ လူဝင်မှုကြီးကြပ်ရေးရဲတပ်ဖွဲ့၊ ခရီးသွားရဲတပ်ဖွဲ့ နှင့် ဒေသန္တရ အုပ်ချုပ်ရေးအဖွဲ့များ ပူးပေါင်းပါဝင်ခဲ့သည်။ချွန်ဘူရီပြည်နယ်ရှိ ဘန်လမွန်နှင့် ဆီရာချာခရိုင်များတွင် ပြုလုပ်ခဲ့သော စစ်ဆင်ရေးတစ်ခုတည်းတွင်ပင် ကမ္ဘောဒီးယား၊ မြန်မာနှင့် လာအိုနိုင်ငံများမှ ရွှေ့ပြောင်းအလုပ်သမား ၇၀၀ ကျော်အား စစ်ဆေးခဲ့ရာ ပြစ်မှုကျူးလွန်သူ ၂၅၀ ကျော်ကို ဖမ်းဆီးတွေ့ရှိခဲ့ကြောင်း သိရသည်။စစ်ဆင်ရေးအတွင်း မူးယစ်ဆေးဝါး နှိမ်နင်းရေး လုပ်ငန်းများအရ ဖမ်းဆီးမှုပေါင်း ၁၂,၈၃၃ မှု ရှိခဲ့ပြီး နိုင်ငံအလိုက် ဖမ်းဆီးခံရသူများတွင် မြန်မာ (၄,၉၂၃ ဦး)၊ ကမ္ဘောဒီးယား (၅၀၆ ဦး)၊ လာအို (၅၀၇ ဦး) အပါအဝင် အခြားနိုင်ငံသား ၃,၀၄၇ ဦး ပါဝင်ကြောင်း ထုတ်ပြန်ချက်အရ သိရသည်။လူဝင်မှုကြီးကြပ်ရေးရဲတပ်ဖွဲ့က ပြည်သူများအား တရားမဝင်ရွှေ့ပြောင်းနေထိုင်သူများ သို့မဟုတ် တရားမဝင်လုပ်ဆောင်မှုများနှင့် ပတ်သက်သည့် အချက်အလက်များကို ၂၄ နာရီပတ်လုံး ၁၉၁ သို့မဟုတ် ၁၅၉၉ ဖုန်းနံပါတ်များသို့ သတင်းပေးပို့ရန် တိုက်တွန်းထားသည်။
