လီဗာပူးလ်အသင်းရဲ့ အောင်ပွဲခံအခမ်းအနားမှာ ကားနဲ့ဝင်တိုက်ခဲ့သူ ထောင်ဒဏ်(၂၁)နှစ်နဲ့ (၆)လ ချမှတ်ခံရ

ပြီးခဲ့သည့် မေလ ၂၆ ရက်နေ့က လီဗာပူးလ်အသင်း၏ ပရီးမီးယားလိဂ်ချန်ပီယံဆု အောင်ပွဲခံအခမ်းအနားတွင် စုဝေးနေသည့် ပရိသတ်ထောင်ပေါင်းများစွာကြားထဲသို့ ကားဖြင့် ဝင်ရောက်တိုက်ခိုက်ခဲ့သူ ပေါလ် ဒွိုင်း (၅၄ နှစ်) အား ထောင်ဒဏ် ၂၁ နှစ်နှင့် ၆ လ ချမှတ်လိုက်ကြောင်း သိရသည်။ ၎င်း၏ ဆိုးရွားသော ပြစ်မှုကြောင့် အသက် ၆ လအရွယ် ကလေးငယ်နှင့် ၇၇ နှစ်အရွယ် အမျိုးသမီးအပါအဝင် စုစုပေါင်း လူ ၁၃၄ ဦး ဒဏ်ရာရရှိခဲ့သည်။ ကလေးသုံးဦး၏ ဖခင်ဖြစ်သူ ပေါလ် ဒွိုင်းသည် သူငယ်ချင်းများနှင့် တွေ့ဆုံရန် လီဗာပူးလ်မြို့လယ်သို့ ရောက်ရှိနေစဉ် ယခုလို ပြစ်မှုကျူးလွန်ခဲ့ခြင်းဖြစ်ကြောင်း သိရသည်။