ကျပ် ၁၅ ဘီလီယံကျော်တန်ဖိုးရှိ ဘိန်းဖြူနှင့် စိတ်ကြွဆေးပြားများ စစ်ကိုင်းမြို့တွင် ဖမ်းဆီးရမိ

ဒီဇင်ဘာ ၆ ရက်နေ့တွင် စစ်ကိုင်းမြို့၊ ရွာထောင်(မီးရထား)ရပ်ကွက်ရှိ နေအိမ်တစ်လုံးနှင့် ယာဉ်နှစ်စီးအတွင်းမှ ဒေသတန်ဖိုးငွေ ကျပ် ၁၅.၅၇ ဘီလီယံကျော်ရှိသော ဘိန်းဖြူ ၅၇.၉၁၅ ကီလိုဂရမ်နှင့် စိတ်ကြွရူးသွပ်ဆေးပြား ၅.၇ သန်းကို လက်ဝယ်ထားရှိသူ ၆ ဦးနှင့်အတူ ဖမ်းဆီးရမိခဲ့ကြောင်း သိရသည်။ ဖမ်းဆီးရမိသူများမှာ စိုးလွင်၊ မခင်ဆွေမြင့်၊ မိုးမင်းစံ၊ မျိုးသူရ၊ ချစ်ကိုကိုနိုင်နှင့် ခင်မောင်ဇော်တို့ဖြစ်ပြီး၊ ၎င်းတို့သည် မူးယစ်ဆေးဝါးများအား ရှမ်းပြည်နယ်မှ စစ်ကိုင်းတိုင်းဒေသကြီးသို့ သယ်ဆောင်ကာ မန္တလေးမြို့သို့ ဆက်လက်သယ်ယူရန် စီစဉ်ခြင်းဖြစ်ကြောင်း စစ်ဆေးပေါ်ပေါက်ခဲ့သည်။ ပြစ်မှုကျူးလွန်သူများအား မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာ ဥပဒေအပြင် ငွေကြေးခဝါချမှု တိုက်ဖျက်ရေးဥပဒေဖြင့်ပါ ဆက်လက်အရေးယူဆောင်ရွက်နေပြီး ကွင်းဆက်ပြစ်မှုကျူးလွန်သူများကိုလည်း ဖော်ထုတ်လျက်ရှိသည်။