မန်ယူနိုက်တက်အသင်းနည်းပြ ရူဘင်အာမိုရင်မ်က ဘုန်းမောက်နဲ့ လေးဂိုးစီ သရေကျတဲ့ပွဲအပြီးမှာ အခုရလဒ်ထက် ကွဲပြားခြားနားတဲ့ရလဒ် ရခဲ့သင့်တယ်လို့ မှတ်ချက်ပြုခဲ့ပါတယ်။မန်ယူနိုက်တက်အသင်းဟာ အခုပွဲမှာ သုံးကြိမ်တိုင် ဦးဆောင်ခဲ့ပေမဲ့ အမှတ်ခွဲယူခဲ့ရတာဖြစ်တယ်။ဒီပွဲရလဒ်က မန်ယူနိုက်တက်အသင်းကို အိမ်ကွင်းသုံးပွဲဆက် နိုင်ပွဲပျောက်ဆုံးစေခဲ့ပါတယ်။မန်ယူနိုက်တက်အသင်းဟာ နောက်ဆုံးကစားတဲ့ ပရီးမီးယားလိဂ်ခုနစ်ပွဲမှာ နှစ်ပွဲသာ အနိုင်ရခဲ့တာပါ။ဒါ့အပြင် ပရီးမီးယားလိဂ် ထိပ်ဆုံးငါးသင်းစာရင်းထဲ ဝင်ရောက်နိုင်မယ့် အခွင့်အရေးလည်း လက်လွှတ်ခဲ့ရပါတယ်။
