၃၃ ကြိမ်မြောက် SEA Games ဖူဆယ်ပြိုင်ပွဲအတွက် မြန်မာအမျိုးသားဖူဆယ်အသင်း အင်ဒိုနီးရှားနှင့် ဒီဇင်ဘာ ၁၅ ရက်တွင် စတင်ယှဉ်ပြိုင်မည်

၃၃ ကြိမ်မြောက် အရှေ့တောင်အာရှ အားကစားပြိုင်ပွဲ (33rd SEA Games) ဖူဆယ်အမျိုးသား ပွဲစဉ်များအတွက် ပွဲကြိုညှိနှိုင်းအစည်းအဝေးနှင့် သတင်းစာရှင်းလင်းပွဲကို ပြိုင်ပွဲဝင်အသင်းများ တည်းခိုရာဟိုတယ်တွင် ကျင်းပပြုလုပ်ခဲ့သည်။ မြန်မာ့လက်ရွေးစင် အမျိုးသားဖူဆယ်အသင်းနည်းပြ Mr. Pattaya Piamkum က ပြင်ဆင်ချိန် အများကြီးမရခဲ့သော်လည်း ကိုယ့်အင်အားနှင့် အကောင်းဆုံးကြိုးစားယှဉ်ပြိုင်သွားမည်ဟု ပြောကြားခဲ့ပြီး၊ ပြိုင်ဆိုင်မှုပြင်းထန်မည့် ယခုပြိုင်ပွဲသည် အသင်းကောင်းများနှင့် ရင်ဆိုင်ရမည်ဖြစ်၍ တန်ဖိုးရှိသော အတွေ့အကြုံများ ရရှိမည်ဟုလည်း ပြောကြားခဲ့သည်။ ထို့နောက် မြန်မာအမျိုးသားဖူဆယ်အသင်းသည် ပြိုင်ပွဲကျင်းပမည့် Nonthaburi Stadium သို့ ထွက်ခွာ၍ official training ပြုလုပ်ခဲ့သည်။ မြန်မာအသင်းသည် အုပ်စုပွဲစဉ်များကို ဒီဇင်ဘာ ၁၅ ရက် နေ့လယ် ၃:၃၀ နာရီတွင် အင်ဒိုနီးရှား၊ ဒီဇင်ဘာ ၁၆ ရက်တွင် ထိုင်း၊ ဒီဇင်ဘာ ၁၇ ရက်တွင် မလေးရှား၊ ဒီဇင်ဘာ ၁၉ ရက်တွင် ဗီယက်နမ် အသင်းတို့နှင့် ယှဉ်ပြိုင်ကစားရမည်ဖြစ်ပြီး ပွဲစဉ်များကို Channel 7၊ Reader Channel နှင့် HTV Sport Channel တို့မှ တိုက်ရိုက်ထုတ်လွှင့်ပြသမည်ဖြစ်သည်။