ထိုင်းနိုင်ငံ အထူးစုံစမ်းစစ်ဆေးရေး ဌာန (DSI) ဟာ Cryptocurrency တွေ ပေးပြီး မျက်လုံးကို Scan လုပ်တဲ့ ပရောဂျက်တစ်ခုနဲ့ ပတ်သက်တဲ့ တိုင်ကြားချက်တွေကို စုံစမ်းစစ်ဆေးဖို့ ပြင်ဆင်နေပါတယ်။World (ယခင် Worldcoin) ခရစ်ပတိုငွေကြေး ပေးပြီး လူတွေကို မျက်လုံးစကင်န်ဖတ်ခိုင်းတဲ့ Tools for Humanity ရဲ့ ဒေသတွင်း လက်ခွဲအပေါ် စွပ်စွဲချက်တွေကို DSI က အထူးအမှုအနေနဲ့ ကိုင်တွယ်ဆောင်ရွက်နေပါတယ်။ ဒီလို လုပ်ဆောင်ချက်ဟာ ကွန်ပျူတာပြစ်မှုဆိုင်ရာ ဥပဒေ (Computer Crime Act) နဲ့ ငြိစွန်းနိုင်တယ်လို့ စုံစမ်းစစ်ဆေးသူတွေက ပြောပါတယ်။ဒီလို မျက်လုံး ဒေတာ ကောက်ယူတာဟာ ပုဂ္ဂိုလ်ရေးဆိုင်ရာနဲ့ လုံခြုံရေးဆိုင်ရာ စိုးရိမ်စရာတွေ ဖြစ်စေတယ်လို့ ထိုင်းအာဏာပိုင်တွေက ပြောထားပါတယ်။ဒီအမှုမှာ လူသားအထောက်အထား အတည်ပြုဖို့နဲ့ ပါဝင်သူတွေကို World (WLD) တိုကင်တွေ ဆုချဖို့ သုံးတဲ့ Orb မျက်လုံးစကင်န်ဖတ်စက်တွေ ပါဝင်ပတ်သက်နေတယ် ဆိုတာကို DSI က အတည်ပြုပါတယ်။ ၂၀၂၄ ခုနှစ်အတွင်းမှာ ထိုင်းနိုင်ငံသား ၁.၂ သန်းကျော်ဟာ သူတို့ရဲ့ မျက်လုံးကို စကင်န်ဖတ်ခဲ့ကြပါတယ်။ကွန်ပျူတာစနစ်တွေထဲကို မှားယွင်းတဲ့ (သို့မဟုတ်) ထင်ယောင်ထင်မှားဖြစ်စေတဲ့ သတင်းအချက်အလက်တွေ ထည့်သွင်းခဲ့တာကြောင့် ကွန်ပျူတာပြစ်မှုဆိုင်ရာ ဥပဒေကို ချိုးဖောက်ရာရောက်တယ်လို့လည်း အာဏာပိုင်တွေက ယုံကြည်ထားပါတယ်။DSI ဟာ ထိုင်းနိုင်ငံမှာ သုံးတဲ့ မျက်လုံးစကင်န်ဖတ်စက်တွေ နဲ့ ပြည်ပက စက်တွေကြား နည်းပညာ ကွာခြားချက်တွေ၊ ကောက်ယူထားတဲ့ ဇီဝအချက်အလက် (Biometric data) တွေကို ဘယ်လို အလွဲသုံးစား လုပ်နိုင်သလဲ ဆိုတာတွေ နဲ့ Prime Opportunity Fund နဲ့ ခရစ်ပတို ကုမ္ပဏီတွေကြားက ချိတ်ဆက်မှုတွေကို စစ်ဆေးဖို့အတွက် ငွေကြေးခဝါချမှု တိုက်ဖျက်ရေးရုံး (Amlo)၊ နိုင်ငံတကာ ကျွမ်းကျင်ပညာရှင်တွေ နဲ့ ပူးပေါင်းဆောင်ရွက်နေပါတယ်။
