အိန္ဒိယ၏ ဒီပါဝါလီ မီးထွန်းပွဲတော်ကို ယူနက်စကိုက ဒြပ်မဲ့ကမ္ဘာ့ယဉ်ကျေးမှုအမွေအနှစ်အဖြစ် သတ်မှတ်

အိန္ဒိယနိုင်ငံ၏ ရိုးရာမီးထွန်းပွဲတော်ဖြစ်သော ဒီပါဝါလီကို ကုလသမဂ္ဂပညာရေး၊ သိပ္ပံနှင့် ယဉ်ကျေးမှုအဖွဲ့(UNESCO) က ဒြပ်မဲ့ကမ္ဘာ့ယဉ်ကျေးမှုအမွေအနှစ်တစ်ရပ်အဖြစ် ဒီဇင်ဘာ ၁၀ ရက်တွင် သတ်မှတ်ကြေညာခဲ့သည်။ နယူးဒေလီမြို့တော်၌ ဒီဇင်ဘာ ၉ ရက်မှ ၁၁ ရက်အထိ ကျင်းပခဲ့သော ယူနက်စကိုအစည်းအဝေးများတွင် ကျွမ်းကျင်သူများက ဆုံးဖြတ်ခဲ့ခြင်းဖြစ်ပြီး၊ ယင်းသတ်မှတ်မှုကို အိန္ဒိယအစိုးရက ကြိုဆိုခဲ့ကာ ဒေလီမြို့တော်အစိုးရကလည်း ပွဲလမ်းသဘင်များဖြင့် ဂုဏ်ပြုရန် စီစဉ်ထားသည်။ ဒီပါဝါလီပွဲတော်သည် ရာဝဏဘုရင်ကို အောင်နိုင်ခဲ့ပြီးနောက် အယုဒ္ဓယမြို့တော်သို့ ရာမမင်း ပြန်လည်ရောက်ရှိလာမှု အထိမ်းအမှတ်အဖြစ် နှစ်စဉ် အောက်တိုဘာ သို့မဟုတ် နိုဝင်ဘာလနှောင်းပိုင်းတွင် အိန္ဒိယနိုင်ငံနှင့် ကမ္ဘာတစ်ဝန်းရှိ အိန္ဒိယနွယ်ဖွားများက ကျင်းပလေ့ရှိသည်။