ထိုင်းနိုင်ငံ Muang Thong Thani ရှိ IMPACT Forum မှာ ကျင်းပတဲ့ ၁၈ ကြိမ်မြောက် အမျိုးသားကျန်းမာရေးညီလာခံမှာ ပြောကြားချက်အရ ထိုင်းမှာ မကူးစက်နိုင်တဲ့ရောဂါ (NCDs) တွေဟာ သေဆုံးမှုအများဆုံး အကြောင်းရင်းဖြစ်ပြီး တစ်နှစ်ကို လူ ၄ သိန်းကျော် (စုစုပေါင်း သေဆုံးမှုရဲ့ ၇၇ ရာခိုင်နှုန်း) သေဆုံးနေရပါတယ်လို့ သိရပါတယ်။ ဒီရောဂါတွေကြောင့် နိုင်ငံအနေနဲ့ တစ်နှစ်ကို အမေရိကန်ဒေါ်လာ ၆ သန်းကျော် ဆုံးရှုံးနေရပြီး ဆီးချို၊ နှလုံး၊ ကင်ဆာ၊ နာတာရှည် အသက်ရှူလမ်းကြောင်းရောဂါနဲ့ စိတ်ကျန်းမာရေး ပြဿနာတွေက အဓိက သေဆုံးစေတဲ့ အကြောင်းရင်းတွေ ဖြစ်တယ်လို့ Thai Health Promotion Foundation ဒုတိယမန်နေဂျာ Dr. Pairoj Saonuam က ပြောပါတယ်။ဒီရောဂါတွေ ဖြစ်ပွားစေတဲ့ အဓိက အကြောင်းရင်း ၅ ခုကတော့ လေထုညစ်ညမ်းမှု၊ ဆေးလိပ်သောက်ခြင်း၊ ကျန်းမာရေးနဲ့မညီညွတ်တဲ့ အစားအစာ၊ ကိုယ်လက်လှုပ်ရှားမှု နည်းပါးခြင်းနဲ့ အရက်သောက်သုံးခြင်းတို့ ဖြစ်တယ်လို့ ဆိုပါတယ်။ NCDs တွေကြောင့် စီးပွားရေးအရ ဆုံးရှုံးမှုတွေ ကြီးမားနေပြီး အရွယ်မတိုင်ခင် သေဆုံးတာနဲ့ အငြိမ်းစားယူရတာတွေကြောင့် လုပ်သားအင်အား လျော့နည်းသွားတာက စီးပွားရေးဆုံးရှုံးမှုစုစုပေါင်းရဲ့ ၈၆ ရာခိုင်နှုန်းအထိ ရှိနေတယ်လို့ Dr. Pairoj က ထောက်ပြထားပါတယ်။
