အာဆင်နယ်နှင့် လန်ဒန်ဒါဘီပွဲအတွက် ဘာစီလိုနာပွဲကဲ့သို့ ပရိသတ်အားပေးမှု လိုအပ်ကြောင်း ချယ်လ်ဆီးနည်းပြ မာရက်စကာ ပြောကြား

ချယ်လ်ဆီးအသင်း၏ နည်းပြ အန်ဇို မာရက်စကာက အခုတစ်ပတ် အိမ်ကွင်း စတမ်းဖို့ဒ်ဘရစ်ချ်တွင် ယှဉ်ပြိုင်ရမည့် အာဆင်နယ်နှင့် လန်ဒန်ဒါဘီပွဲအတွက် ဘာစီလိုနာအသင်းကို ၃-၀ ဂိုးဖြင့် အနိုင်ရခဲ့သည့် ချန်ပီယံလိဂ်ပွဲစဉ်ကဲ့သို့ ပရိသတ်များ၏ အားပေးမှုမျိုး လိုအပ်ကြောင်း ပြောကြားခဲ့သည်။ မာရက်စကာသည် ဘာစီလိုနာနှင့်ပွဲစဉ်တွင် လာရောက်အားပေးခဲ့သည့် ပရိသတ် ၃၉,၃၂၃ ဦး၏ စည်းလုံးသော အားပေးမှုကို ကျေနပ်အားရခဲ့ပြီး၊ "တနင်္ဂနွေနေ့မှာ တူညီတဲ့ အားပေးမှုမျိုး လိုအပ်ပါတယ်" ဟု တောင်းဆိုခဲ့သည်။ လက်ရှိ ပရီးမီးယားလိဂ်ဇယား၏ ဒုတိယနေရာတွင် ရပ်တည်နေသည့် ချယ်လ်ဆီးအသင်းအနေဖြင့် အမှတ်ပေးဇယားကို ၆ မှတ်အသာဖြင့် ဦးဆောင်နေသော အာဆင်နယ်ကို အနိုင်ရမှသာ အမှတ်ကွာဟမှုကို လျှော့ချနိုင်မည်ဖြစ်သောကြောင့် ယင်းပွဲစဉ်သည် ထိပ်ဆုံးနှစ်သင်းအားပြိုင်ရမည့် ပွဲကြီးပွဲကောင်းဖြစ်လာမည်ဖြစ်သည်။