ထိုင်းနိုင်ငံ ချွန်ဘူရီမှ မြန်မာအလုပ်သမား ၃၁ ဦး လုပ်ခ ဘတ် ၄ သိန်းကျော် မရ၍ တိုင်ကြား

ထိုင်းနိုင်ငံ၊ ချွန်ဘူရီခရိုင်၊ ခေါင်နွဲ့မြို့ရှိ ဆောက်လုပ်ရေးလုပ်ငန်းတစ်ခုတွင် လုပ်ကိုင်နေသော မြန်မာအလုပ်သမား ၃၁ ဦးသည် လုပ်အားခ ဘတ် ၄၀၃,၀၀၀ မရရှိသဖြင့် WAG အဖွဲ့၏ ကူညီဆောင်ရွက်ပေးမှုဖြင့် ယနေ့ နိုဝင်ဘာလ ၂၅ ရက်နေ့တွင် နယ်မြေခံ ဆဝါဒိကန်ရုံး၌ သွားရောက်တိုင်ကြားခဲ့သည်။ အလုပ်သမားများသည် လုပ်သက် ၁ နှစ်မှ ၄ နှစ်အထိ ရှိကြပြီး လစဉ် ၅ ရက်နေ့တွင် လုပ်အားခရှင်းပေးရန် ပြောဆိုထားသော်လည်း မရရှိခဲ့ကြောင်း သိရသည်။ လက်ရှိတွင် အလုပ်ရှင်ဘက်က ဒီဇင်ဘာလ ၁၅ ရက်နေ့တွင် လုပ်ခလစာ ရှင်းပေးမည်ဟု ပြန်လည် ချိန်းဆိုထားကြောင်း WAG အဖွဲ့ခေါင်းဆောင်က ပြောကြားခဲ့သည်။