မြဝတီတွင် ရေဆင်းကူး၍ ပျောက်ဆုံးခဲ့သည့် အမျိုးသား ၄ ဦးထဲမှ ၂ ဦး၏ ရုပ်အလောင်းကို ၉ ရက်အကြာတွင် ပြန်လည်တွေ့ရှိ

ကရင်ပြည်နယ်၊ မြဝတီမြို့နယ်တွင် ပြီးခဲ့သည့် နိုဝင်ဘာလ ၁၇ ရက်နေ့က ရေဆင်းကူးရာမှ ပျောက်ဆုံးသွားခဲ့သော အသက် (၃၀) ဝန်းကျင်ရှိ အမျိုးသားလေးဦးထဲမှ နှစ်ဦး၏ ရုပ်အလောင်းကို ယနေ့ နိုဝင်ဘာ ၂၅ ရက်၊ နံနက် ၉ နာရီတွင် ရှာဖွေတွေ့ရှိကြောင်း မြန်မာနိုင်ငံလူမှုကယ်ဆယ်ရေးအဖွဲ့ချုပ်ရုံး (ဗဟို) ထံမှ သိရသည်။ ပျောက်ဆုံးသူများသည် ချောင်းဆုံတံတားအနီးတွင် ရေကူးပြိုင်ရာမှ တစ်ဦးရေနစ်ကာ ကျန်သုံးဦးပါ ပျောက်ဆုံးခဲ့ခြင်းဖြစ်ပြီး၊ တွေ့ရှိရသည့် ရုပ်အလောင်းများသည် သဲစုပ်စက်အောက်၌ သဲဖုံးလွှမ်းနစ်မြုပ်နေခြင်းဖြစ်နိုင်ကြောင်း ကယ်ဆယ်ရေးတာဝန်ရှိသူတစ်ဦးက ပြောသည်။ လက်ရှိတွင် ကျန်ရှိသော နှစ်ဦး၏ ရုပ်အလောင်းကို ဆက်လက်ရှာဖွေနေပြီး၊ တွေ့ရှိရသည့် ရုပ်အလောင်းနှစ်လောင်းကို မည်သူမည်ဝါဖြစ်ကြောင်း အတည်ပြုနိုင်ရန် မြဝတီပြည်သူ့ဆေးရုံကြီးသို့ ပို့ဆောင်ထားသည်။