ဧရာဝတီတိုင်းဒေသကြီး၊ကျုံပျော်တွင် သက်ငယ်မုဒိမ်းမှုမှ မသင်္ကာသူတစ်ဦးကို ဖမ်းဆီးရမိထားခဲ့

ဧရာဝတီတိုင်းဒေသကြီး၊ ကျုံပျော်မြို့နယ်အတွင်း ပြီးခဲ့သော ရက်ပိုင်းက ကြုံခဲ့ရသည့် သက်ငယ်မုဒိမ်းမှုမှ မသင်္ကာသူတစ်ဦးကို လတ်တလောတွင် ဖမ်းဆီးရမိထားကြောင်း ဒေသခံများ၏ လူမှုကွန်ရက်တွင် ဖော်ပြချက်အရ သိရပါတယ်။အဆိုပါဖြစ်ရပ်မှာ ဧရာဝတီတိုင်းဒေသကြီး၊ ကျုံပျော်မြို့နယ်၊ မကျီးကုန်းအုပ်စု၊ ကင်ပွန်းခြုံကျေးရွာ၌ ဖြစ်ပွားခဲ့သည်ဟု ဆိုကြပြီး ယင်းကျေးရွာနေ အသက် ၁၄ နှစ်အရွယ် မ . . . . ဆိုသူမှာ ဧပြီလ ၁၈ ရက် ည ၇ နာရီခန့်က နေအိမ်မှ ပျောက်ဆုံးသွားခဲ့ကြောင်း၊ ဧပြီလ ၁၉ ရက် မွန်းလွဲပိုင်းလောက်တွင် ၎င်းကျေးရွာရှိ မိချောင်းအိုင်တံတားဘေးက ကန်အတွင်းတွင် ပျောက်ဆုံးနေသူ မ . . . . ၏ ရုပ်အလောင်းကို တွေ့ရှိခဲ့ပါတယ်။ထိုရုပ်အလောင်းကို သက်ဆိုင်ရာမှစစ်ဆေးရာတွင် မုဒိမ်းပြုကျင့်၍ သတ်ဖြတ်ခံထားရခြင်းမျိုးဖြစ်သည့်အတွက် ကျူးလွန်သူကို ဖမ်းဆီးရမိရေးအတွက် လုပ်ဆောင်ခဲ့ကြကြောင်း၊ လတ်တလောတွင် ကျူးလွန်သူဟု သံသယဖြစ်ဖွယ် မသင်္ကာသူ တစ်ဦးကို ဖမ်းဆီးရမိထားခြင်းလည်းဖြစ်ကာ မုဒိမ်းကျင့်သတ်ခံရသည့် အသက် ၁၄ နှစ်အရွယ် မ . . . . ၏ ရုပ်အလောင်းကို ဧပြီလ ၂၁ ရက်က ကျန်ရစ်သူမိသားစုများမှ သဂြိုလ်ခဲ့ကြပြီး လာမည့် ဧပြီလ ၂၅ ရက်တွင် ရက်လည်ဆွမ်းသွတ်၍ ပရိတ်တရားတော်နာကြားကြရန် စီစဉ်ထားကြပါတယ်။