ရန်ကုန်စီးတီးအသင်းသည် လာမည့်ရာသီသစ်အတွက် ဒုတိယမြောက် နိုင်ငံခြားသားကစားသမားအဖြစ် ပြီးခဲ့သည့်ရာသီက ရှမ်းယူနိုက်တက်အသင်းတွင် ခြေစွမ်းပြခဲ့သည့် ဂျပန်တောင်ပံတိုက်စစ်ကစားသမား ရုဂျီဟီရိုတာကို ခေါ်ယူလိုက်သည်။ ရုဂျီဟီရိုတာသည် ရှမ်းယူနိုက်တက်အသင်းသို့ မရောက်ရှိမီ ဂျပန်နှင့် ထိုင်းကလပ်အသင်းများစွာတွင် ကျင်လည်ကစားခဲ့သူဖြစ်ပြီး ရန်ကုန်စီးတီးအသင်းက ၎င်း၏စာချုပ်သက်တမ်းကို ထုတ်ဖော်ပြောကြားခြင်းမရှိသော်လည်း တစ်ရာသီသက်တမ်းသာ ဖြစ်ဖွယ်ရှိကြောင်း သိရသည်။
ရန်ကုန်စီးတီးအသင်းသည် ပြီးခဲ့သည့်ရာသီက အသုံးပြုခဲ့သော ပြည်ပကစားသမား ၅ ဦးစလုံးနှင့် လမ်းခွဲထားပြီးဖြစ်ကာ လက်ရှိတွင် ဘရာဇီးနောက်ခံလူ ပက်ဒရိုနှင့် ဂျပန်ကစားသမား ရုဂျီဟီရိုတာ အပါအဝင် ပြည်ပကစားသမား ၂ ဦး၊ ပြည်တွင်းကစားသမားများဖြစ်ကြသည့် ဇွဲထက်မင်း၊ ဇွဲခန့်မင်း၊ ဘုန်းသစ္စာမင်း၊ မြတ်ကောင်းခန့်၊ သန်းတိုးအောင်နှင့် စိုးအကာတို့အပါအဝင် ပြည်တွင်းကစားသမား ၆ ဦး၊ စုစုပေါင်း ကစားသမားသစ် ၈ ဦးအထိ ခေါ်ယူဖြည့်တင်းထားပြီးဖြစ်ကြောင်း သိရသည်။
