စင်ကာပူတွင် အမြန်လမ်းမပေါ်၌ တက္ကစီဒရိုင်ဘာ သတိလစ်သွားပြီးနောက် ကလေးမိခင်ဖြစ်သူက ကားကိုအရဲစွန့်ရပ်တန့်ကာ အသက်ဘေးမှလွတ်မြောက်ခဲ့

စင်ကာပူနိုင်ငံ ချန်ဂီလေဆိပ်မှ လာဗင်ဒါ (Lavender) သို့ သွားရန်အတွက် သက်တမ်းရင့် ComfortDelGro တက္ကစီတစ်စီးကို ယမန်နေ့က သားဖြစ်သူနှင့်အတူ စီးနင်းလာသည့် အသက် ၃၆ နှစ်အရွယ် ကလေးမိခင် ဝင်းနီးလီ (Winnie Lee) သည် အရှေ့ကမ်းရိုးတန်းအမြန်လမ်း (ECP) ပေါ်၌ ဒရိုင်ဘာဖြစ်သူ ရုတ်တရက် သတိလစ်သွားခြင်းကြောင့် ထိတ်လန့်စရာ အရေးပေါ်အခြေအနေတစ်ခုနှင့် ကြုံတွေ့ခဲ့ရသည်။ ကားမောင်းနေစဉ်အတွင်း တက္ကစီသည် လမ်းလယ်ကျွန်းရှိ ချုံပုတ်များနှင့် စတင်တိုက်မိပြီး လမ်းကြောင်းလွဲလာသဖြင့် လီက ဒရိုင်ဘာအား သတိပေးစကားပြောခဲ့သော်လည်း ဒရိုင်ဘာက ဝေဝေဝါးဝါးပြန်ဖြေပြီးနောက် လုံးဝသတိလစ်သွားခဲ့သည်။ ကားသည် လမ်းဘေးအတားအဆီး Barrier များကို ဆက်တိုက်တိုက်မိကာ မောင်းနှင်နေဆဲဖြစ်သဖြင့် လီသည် နောက်ခန်းမှနေ၍ ညာဘက်ကားတံခါးကိုဖွင့်ကာ လမ်းဘေးအတားအဆီးများနှင့် ပွတ်တိုက်မှု (Friction) ဖန်တီးပြီး ကားအရှိန်လျော့သွားစေရန် အရဲစွန့်ကြိုးပမ်းခဲ့သည်။ ကားသည် အရှိန်လျော့ကာ တဖြည်းဖြည်းချင်း ရပ်တန့်သွားချိန်တွင် နောက်မှမောင်းနှင်လာသည့် အခြားယာဉ်မောင်းတစ်ဦးက မြင်တွေ့၍ ကူညီပေးခဲ့သဖြင့် လီနှင့် ၎င်း၏ ၆ နှစ်အရွယ် သားဖြစ်သူတို့မှာ တစ်စုံတစ်ရာ ထိခိုက်ဒဏ်ရာရရှိခြင်းမရှိဘဲ ဘေးကင်းစွာ ထွက်ခွာနိုင်ခဲ့ကြသည်။ ရဲတပ်ဖွဲ့နှင့် စင်ကာပူမြို့ပြကာကွယ်ရေးတပ်ဖွဲ့ (SCDF) တို့က အသက် ၇၃ နှစ်အရွယ် တက္ကစီဒရိုင်ဘာအဘိုးအိုကို တန်တော့ဆန်း (Tan Tock Seng) ဆေးရုံသို့ အရေးပေါ်ပို့ဆောင်ပေးခဲ့ရပြီး လက်ရှိအချိန်အထိ သတိပြန်မလည်သေးကြောင်းနှင့် ရဲတပ်ဖွဲ့က ဤဖြစ်စဉ်ကို ဆက်လက်စုံစမ်းစစ်ဆေးနေကြောင်း သိရသည်။