ဗီယက်နမ်၊ဟိုချီမင်းစီးတီးက ၎င်း၏ နည်းပညာမြင့်စက်မှုဇုန်ကို ၁၉၅ ဟက်တာနီးပါး ထပ်မံတိုးချဲ့ရန် စီစဉ်

ဗီယက်နမ်နိုင်ငံ ဟိုချီမင်းစီးတီး ပြည်သူ့ကော်မတီသည် ဆိုင်ဂုံနည်းပညာမြင့်စက်မှုဇုန် (SHTP) ကို ၁၉၄ ဒသမ ၈၄ ဟက်တာ (၁၉၅ ဟက်တာနီးပါး) ထပ်မံတိုးချဲ့ပြီး သိပ္ပံနှင့် နည်းပညာဆိုင်ရာဥယျာဉ် (Science and Technology Park) အဖြစ် အဆင့်မြှင့်တင်မည့် စီမံကိန်းအကောင်အထည်ဖော်မှုအစီအစဉ်ကို တရားဝင်ထုတ်ပြန်လိုက်သည်။ ဝန်ကြီးချုပ်၏ ခွင့်ပြုချက်ဖြင့် လောင်းဖူး (Long Phuoc) ရပ်ကွက်အတွင်း တိုးချဲ့မည့် ဤဧရိယာအသစ်သည် ရိုးရိုးစက်မှုဇုန်အဆင့်မှ သိပ္ပံနည်းကျသုတေသနပြုခြင်း၊ ခေတ်မီမဟာဗျူဟာမြောက်နည်းပညာများ တီထွင်ခြင်း၊ စီးပွားရေးလုပ်ငန်းများ ပျိုးထောင်ပေးခြင်းနှင့် နည်းပညာလွှဲပြောင်းစီးပွားဖြစ်ထုတ်လုပ်ခြင်း (Commercialization) တို့ကို အဓိကထားဆောင်ရွက်မည့် နည်းပညာဗဟိုချက်ဖြစ်လာမည်ဖြစ်သည်။ အဆိုပါ တိုးချဲ့ဇုန်အတွင်း မိုက်ခရိုအီလက်ထရွန်နစ်၊ အော်တိုမေးရှင်း၊ အိုင်တီနှင့် ဇီဝနည်းပညာဆိုင်ရာ သုတေသနစင်တာများကို တည်ဆောက်သွားမည်ဖြစ်ပြီး ခေတ်မီဒီဂျစ်တယ်အခြေခံအဆောက်အအုံများနှင့်အတူ ၂၀၅၀ ပြည့်နှစ်မတိုင်မီ ကာဗွန်ဓာတ်ငွေ့ထုတ်လွှတ်မှု လုံးဝမရှိစေမည့် (Carbon Neutrality) စိမ်းလန်းစမတ်မော်ဒယ်စနစ်ကို ကျင့်သုံးသွားမည်ဖြစ်သည်။ လက်ရှိ ဆိုင်ဂုံနည်းပညာမြင့်စက်မှုဇုန်တွင် အမေရိကန်ဒေါ်လာ ၁၃ ဒသမ ၇ ဘီလီယံကျော် တန်ဖိုးရှိသော စီမံကိန်းပေါင်း ၁၆၆ ခု လည်ပတ်နေပြီး ယခုတိုးချဲ့မှုမှတစ်ဆင့် ပြည်တွင်းပြည်ပ နည်းပညာကော်ပိုရေးရှင်းကြီးများကို ပိုမိုဆွဲဆောင်ကာ မြို့ပြစီးပွားရေးကို တစ်ဆတ်တည်း မြှင့်တင်သွားရန် မြို့တော်အာဏာပိုင်များက မြေယာလျော်ကြေးပေးခြင်းနှင့် အခြေခံအဆောက်အအုံပြင်ဆင်ခြင်းများကို အရှိန်အဟုန်မြှင့် လုပ်ဆောင်နေကြောင်း သိရသည်။