ဂျပန်နိုင်ငံတောင်ပိုင်း အိုကီနာဝါကျွန်းစုပြည်နယ်သို့ နေအိမ်များကိုပင် ပြိုလဲပျက်စီးစေနိုင်လောက်သည့် ပြင်းထန်သော လေပြင်းများနှင့်အတူ စနေနေ့တွင် ဝင်ရောက်တိုက်ခတ်ခဲ့သည့် “ဗာဗီ” (Bavi) တိုက်ဖွန်းမုန်တိုင်းကြောင့် လေကြောင်းခရီးစဉ်များ ဖျက်သိမ်းခဲ့ရပြီး မိုးလေဝသဌာနက မြေပြိုခြင်းနှင့် ရေကြီးခြင်းဘေးအန္တရာယ်များကို သတိပေးနှိုးဆော်ထားရသည်။ ဂျပန်မိုးလေဝသအေဂျင်စီ၏ ထုတ်ပြန်ချက်အရ ယခုရာသီ၏ ၉ ကြိမ်မြောက်ဖြစ်သော အဆိုပါမုန်တိုင်းသည် လှိုင်းကြီးခြင်းနှင့် မုန်တိုင်းဒီရေတက်ခြင်းများကိုပါ သယ်ဆောင်လာနိုင်သဖြင့် ကမ်းရိုးတန်းနှင့် မြစ်ကမ်းနားတစ်လျှောက် မြေနိမ့်ပိုင်းဒေသများတွင် ရေကြီးရေလျှံမှုများ ဖြစ်ပေါ်လာနိုင်ကြောင်း သိရသည်။ မုန်တိုင်းသည် စနေနေ့ ဒေသစံတော်ချိန် နံနက် ၆ နာရီတွင် အိုကီနာဝါရှိ မီယာကိုကျွန်း၏ အရှေ့တောင်ဘက်မျက်နှာချင်းဆိုင်၌ တစ်နာရီလျှင် ၂၀ ကီလိုမီတာနှုန်းဖြင့် ရွေ့လျားနေပြီး အမြင့်ဆုံးလေတိုက်နှုန်းမှာ တစ်နာရီလျှင် ၂၁၆ ကီလိုမီတာအထိ ရှိကာ ဂျပန်နိုင်ငံမှ မထွက်ခွာမီ ဝေးလံခေါင်သီသော ဆာကီရှီးမားကျွန်းစုကို ဖြတ်သန်းသွားမည်ဟု ခန့်မှန်းထားကြောင်း သိရသည်။
