နိုင်ငံတော်က စားအုန်းဆီတစ်ပိဿာလျှင် ၇,၀၀၀ ကျပ်မှ ၉,၀၀၀ ကျပ်ကြား သတ်မှတ်ရည်ညွှန်းဈေးဖြင့် တစ်လလျှင် တန်ချိန် ၅ သောင်းကျော် ဆက်တိုက်တင်သွင်း ဖြန့်ဖြူးပေးနေသော်လည်း ဝိသမလောဘသားများကြောင့် ပြည်သူများ လက်ဝယ်တွင် ၁၈,၀၀၀ ကျပ်မှ ၂၀,၀၀၀ ကျပ်ကြား ဈေးအမြင့်ဖြင့် ဝယ်ယူနေရသဖြင့် ပြည်သူများ မနစ်နာစေရန် စိစစ်ဆောင်ရွက်မှုများ ပြုလုပ်နေကြောင်း နိုင်ငံတော်သမ္မတရုံး ပြောရေးဆိုခွင့်ရှိသူ ဒေါက်တာ ခိုင်ခိုင်စိုးက ပြောကြားသည်။ လက်ရှိတွင် ပြည်သူများ စားသုံးဆီမပြတ်လပ်စေရန် နိုင်ငံခြားငွေအခြေအနေကို ချင့်ချိန်တင်သွင်းပေးနေပြီး၊ စားသုံးဆီဝယ်ယူခွင့်စာအုပ်ရှိသူများ သက်သာသောဈေးနှုန်းဖြင့် ဝယ်ယူနိုင်ရန် စီစဉ်ထားရှိရာ လူဦးရေနှင့် လိုအပ်ချက်မြင့်မားသော ရန်ကုန်တိုင်းဒေသကြီး အပါအဝင် မြို့ကြီးများကို အလေးထား၍ ပိုမိုခွဲတမ်းချ ဖြန့်ဖြူးပေးလျက်ရှိကြောင်း သိရသည်။
