ဂျပန်အနောက်တောင်ပိုင်း ကျွန်းစုများတွင် အင်အားပြင်းတိုင်ဖွန်းမုန်တိုင်း ဘာဗီ (Bavi) ကြောင့် အရေးပေါ်သတိပေးချက်ထုတ်ပြန်ပြီး လေကြောင်းလိုင်းများ ဖျက်သိမ်း

ဂျပန်နိုင်ငံ မိုးလေဝသအေဂျင်စီ (JMA) ၏ ထုတ်ပြန်ချက်အရ ပမာဏကြီးမားပြီး အလွန်အင်အားပြင်းထန်သော တိုင်ဖွန်းမုန်တိုင်း ဘာဗီ (Typhoon Bavi) သည် သောကြာနေ့တွင် ဂျပန်အနောက်တောင်ပိုင်းရှိ အိုကီနာဝါစီရင်စု ဆာကီရှီးမား (Sakishima) ကျွန်းစုများသို့ ချဉ်းကပ်လာနေသဖြင့် ဒေသတွင်း၌ ပြင်းထန်သောလေတိုက်ခတ်ခြင်း၊ မိုးသည်းထန်စွာရွာသွန်းခြင်း၊ မြေပြိုခြင်းနှင့် ရေကြီးခြင်းဘေးအန္တရာယ်များအတွက် အထူးသတိပေးချက် ထုတ်ပြန်ထားသည်။ မုန်တိုင်းသည် ဖိလစ်ပိုင်မြောက်ပိုင်းပင်လယ်ပြင်မှတစ်ဆင့် အနောက်မြောက်ဘက်သို့ ရွေ့လျားလာခြင်းဖြစ်ပြီး လက်ရှိတွင် ဗဟိုချက်လေဖိအား ၉၃၀ ဟက်တိုပါစကယ်ရှိကာ အမြင့်ဆုံးလေတိုက်နှုန်းမှာ တစ်နာရီလျှင် ၁၆၂ ကီလိုမီတာမှ ၁၈၀ ကီလိုမီတာအထိ ရှိနေသည်။ မုန်တိုင်းအန္တရာယ်ကြောင့် ဂျပန်လေကြောင်းလိုင်း (JAL) က သောကြာနေ့အတွက် နာဟာ၊ အီရှီဂါကီနှင့် မီယာကိုကျွန်းများသို့ ပြေးဆွဲမည့် ပြည်တွင်း/ပြည်ပ လေကြောင်းခရီးစဉ် ၄၈ ခုကို ဖျက်သိမ်းခဲ့ပြီး၊ All Nippon Airways ကလည်း သောကြာနှင့် စနေနေ့များအတွက် မီယာကိုနှင့် အီရှီဂါကီလေဆိပ် ခရီးစဉ်အားလုံးကို ဖျက်သိမ်းခဲ့ရာ ခရီးသည်ပေါင်း ၁၅,၀၀၀ ကျော် ထိခိုက်မှုရှိခဲ့သည်။ ထို့ပြင် အိုကီနာဝါနှင့် ကာဂိုရှီးမားစီရင်စုတို့ကို ဆက်သွယ်ထားသည့် ကူးတို့သင်္ဘော (Ferry) ပြေးဆွဲမှုများကိုလည်း ရပ်ဆိုင်းထားပြီး၊ ခရီးသွားများအကြား ရေပန်းစားသော အီရှီဂါကီ (Ishigaki) ကျွန်းပေါ်ရှိ ဒေသခံများသည် ၎င်းတို့၏ နေအိမ်များနှင့် အရောင်းဆိုင်များတွင် မုန်တိုင်းဒဏ်ခံနိုင်ရန် ပြတင်းပေါက်များကို တိပ်များဖြင့်ကပ်ခြင်း၊ အကာအကွယ်ပိုက်များတပ်ဆင်ခြင်းနှင့် ရိက္ခာစုဆောင်းခြင်းများကို ကြိုတင်ပြင်ဆင်နေကြသည်။ အဆိုပါ တိုင်ဖွန်းမုန်တိုင်းသည် သောကြာနေ့မွန်းလွဲပိုင်းမှ စနေနေ့နံနက်ပိုင်းအထိ ဆာကီရှီးမားကျွန်းစုများအနီးမှ ဖြတ်သန်းပြီးနောက် တရုတ်နိုင်ငံအရှေ့ပိုင်း ဖူကျန်းပြည်နယ်သို့ တနင်္ဂနွေနေ့တွင် ကုန်းတွင်းပိုင်းသို့ ဝင်ရောက်မည်ဟု ခန့်မှန်းထားကြောင်း သိရသည်။