ဗီယက်နမ်နိုင်ငံရှိ သစ်တောစီမံခန့်ခွဲရေးဌာနအားလုံး ဂျီအိုင်အက်စ်၊ အဝေးမှအာရုံခံစနစ်နှင့် ဂျီပီအက်စ် နည်းပညာများ ရာနှုန်းပြည့် အသုံးပြုလာ

ဗီယက်နမ်အလယ်ပိုင်း ကွမ်ငိုင် (Quang Ngai) ပြည်နယ်ရှိ သစ်တောစီမံခန့်ခွဲရေး လုပ်ငန်းဌာနအားလုံးသည် သစ်တောနယ်မြေ ပြောင်းလဲမှုများကို စောင့်ကြည့်ရန်အတွက် ပထဝီဝင်သတင်းအချက်အလက်စနစ် (GIS)၊ အဝေးမှအာရုံခံ ဂြိုဟ်တုဓာတ်ပုံစနစ် (Remote Sensing) နှင့် ကမ္ဘာလုံးဆိုင်ရာ တည်နေရာပြစနစ် (GPS) နည်းပညာများကို ရာနှုန်းပြည့် ပေါင်းစပ်အသုံးပြုလျက်ရှိသည်။ပြည်နယ်ပြည်သူ့ကော်မတီ၏ အစီရင်ခံစာအရ ပြီးခဲ့သည့် ၂၀၂၀ မှ ၂၀၂၅ ခုနှစ်အတွင်း ဒစ်ဂျစ်တယ်နည်းပညာကို ထိရောက်စွာ အသုံးချနိုင်ခဲ့ခြင်းကြောင့် သစ်တောပြုန်းတီးမှုနှင့် တရားမဝင် ကျူးကျော်မှုများကို စောစီးစွာ သိရှိတားဆီးနိုင်ခဲ့ပြီး၊ သစ်တောဥပဒေချိုးဖောက်မှု ဖြစ်စဉ်ပေါင်းသည် ၂၀၂၀ ပြည့်နှစ်တွင် ၇၀၉ မှု ရှိခဲ့ရာမှ ၂၀၂၅ ခုနှစ်တွင် ၉၀ မှုအထိ (၈၇ ရာခိုင်နှုန်းခန့်) သိသိသာသာ ကျဆင်းသွားခဲ့သည်။ ကွမ်ငိုင်ပြည်နယ်သည် ငါးနှစ်တာကာလအတွင်း သစ်တောဖုံးလွှမ်းမှုနှုန်းကို ၅၉.၄၅ ရာခိုင်နှုန်းအထိ ထိန်းသိမ်းထားနိုင်ခဲ့ပြီး စုစုပေါင်း သစ်တောစိုက်ခင်း ဟက်တာ ၁၆၀,၉၀၀ ကျော် စိုက်ပျိုးနိုင်ခဲ့သည့်အပြင်၊ သစ်တောရိပ်အောက်တွင် စိုက်ပျိုးသည့် အဖိုးတန် ဗီယက်နမ် ငေါ့လင်း (Ngoc Linh) ဂျင်ဆင်း ဆေးဘက်ဝင်အပင် စိုက်ပျိုးမှု ဧရိယာသည်လည်း ဟက်တာ ၃,၂၂၈ ကျော်အထိ ရှိလာခဲ့သည်။ လာမည့် ၂၀၂၆ မှ ၂၀၃၀ ပြည့်နှစ်အတွင်း ပြည်နယ်၏ သစ်တောဖုံးလွှမ်းမှုကို ၆၀ ရာခိုင်နှုန်းအထိ မြှင့်တင်ရန်နှင့် ကမ္ဘာ့သစ်တောအုပ်ချုပ်မှုကောင်စီ (FSC) ရေရှည်တည်တံ့သော သစ်တောစီမံခန့်ခွဲမှု စံချိန်စံညွှန်း အသိအမှတ်ပြုလက်မှတ်ရ သစ်တောဧရိယာကို ဟက်တာ ၄၀,၀၀၀ အထိ တိုးချဲ့ကာ ပိုမိုခေတ်မီပြီး အဖိုးတန်သည့် စိမ်းလန်းစိုပြည်သော သစ်တောကဏ္ဍတစ်ခု တည်ဆောက်သွားရန် ရည်မှန်းထားကြောင်း သိရသည်။