တရားမဝင် CNG ဓာတ်ငွေ့ ပြန်လည်ရောင်းချခဲ့သည့် YBS (65) နှင့် ခရီးသည်တင်ယာဉ်တစ်စီးကို ရာသက်ပန် ဓာတ်ငွေ့ဖြည့်သွင်းခွင့် ပိတ်သိမ်း

ရန်ကုန်တိုင်းဒေသကြီးအတွင်း မော်တော်ယာဉ်သုံး သဘာဝဓာတ်ငွေ့ (CNG) ကို တရားမဝင် လွှဲပြောင်းရောင်းချခဲ့သည့် YBS (65) ယာဉ်တစ်စီးနှင့် အခြားခရီးသည်တင်ယာဉ်တစ်စီးတို့ကို ရာသက်ပန် ဓာတ်ငွေ့ဖြည့်သွင်းခွင့် ပိတ်သိမ်းအရေးယူလိုက်ကြောင်း လျှပ်စစ်နှင့်စွမ်းအင်ဝန်ကြီးဌာနမှ သိရသည်။ နိုင်ငံတော်မှ CNG ဓာတ်ငွေ့ကို သက်သာသောဈေးနှုန်းဖြင့် ပံ့ပိုးပေးထားခြင်းဖြစ်၍ YBS ယာဉ်များအနေဖြင့် ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) ၏ ကြီးကြပ်မှုဖြင့် သတ်မှတ်လမ်းကြောင်းအတိုင်းသာ ပြေးဆွဲရန် ညွှန်ကြားထားခြင်းဖြစ်သည်။သို့သော် YBS (65) ယာဉ်လိုင်းတံဆိပ် တပ်ဆင်ထားသည့် ယာဉ်အမှတ် (2I-2957) သည် လမ်းကြောင်းအတိုင်း ပြေးဆွဲခြင်းမရှိဘဲ တောင်ဒဂုံမြို့နယ် ရွာသာကြီးအကြီးစားစက်မှုဇုန်အတွင်း စက်ရုံဖယ်ရီအဖြစ် ပြေးဆွဲနေသည့်အပြင်၊ မိမိတို့ရရှိသည့် CNG ဓာတ်ငွေ့များကို ယာဉ်အမှတ် (6F-3682) ခရီးသည်တင်ယာဉ်သို့ တရားမဝင် ပြန်လည်ရောင်းချနေကြောင်း တိုင်ကြားချက်အရ တာဝန်ရှိသူများက ဝင်ရောက်စစ်ဆေးခဲ့သည်။ စစ်ဆေးမှုအတွင်း အမှန်တကယ် ကျူးလွန်ကြောင်း တွေ့ရှိရသဖြင့် ဇွန်လ ၃၀ ရက်နေ့မှစတင်ကာ အဆိုပါ မော်တော်ယာဉ် နှစ်စီးလုံးကို ရာသက်ပန် ဓာတ်ငွေ့ဖြည့်သွင်းခွင့် ပိတ်သိမ်းကာ ပြတ်ပြတ်သားသား အရေးယူဆောင်ရွက်ခဲ့ကြောင်း သိရသည်။