လာအိုနိုင်ငံ ဗီယင်ကျန်းမြို့တွင် ၉.၃ ကီလိုမီတာရှည်သည့် မဲခေါင်မြစ်ကမ်းထိန်းနံရံ တည်ဆောက်ရေးစီမံကိန်း ပြီးစီး

လာအိုနိုင်ငံ၊ မြို့တော်ဗီယင်ကျန်း (Vientiane) တွင် ရေဘေးကာကွယ်ရန်နှင့် အများပြည်သူအပန်းဖြေနိုင်ရန် ရည်ရွယ်တည်ဆောက်နေသည့် ၉.၃ ကီလိုမီတာရှည်လျားသော မဲခေါင်မြစ်ကမ်းထိန်းနံရံ (Mekong Embankment) တည်ဆောက်ရေးစီမံကိန်း (ဒုတိယအဆင့်) သည် ၂၀၂၆ ခုနှစ် ဇွန်လကုန်တွင် သတ်မှတ်ရက်အတိုင်း အောင်မြင်စွာ ပြီးစီးသွားပြီဖြစ်သည်။အဆိုပါစီမံကိန်းကို ဆီဆတ်တာနက်ခရိုင် (Sisattanak District) ရှိ ဝတ်နက် (Vat Nak) ကျေးရွာမှ ဟတ်ဆိုက်ဖောင်ခရိုင် (Hadxaifong District) ရှိ ဟတ်ဒေါက်ကဲအို (Had Dokkeo) ကျေးရွာအထိ မဲခေါင်မြစ်ကမ်းတစ်လျှောက် တည်ဆောက်ခဲ့ခြင်းဖြစ်ပြီး၊ ၂၀၂၂ ခုနှစ် ဖေဖော်ဝါရီလကတည်းက စတင်ခဲ့ခြင်းဖြစ်သည်။ယခုအခါ မြစ်ကမ်းပါးပြိုကျမှု ကာကွယ်ရေးကျောက်စီနံရံများ၊ ရေတားတံတိုင်းများနှင့်အတူ အများပြည်သူအပန်းဖြေရန် ပန်းခြံ၊ အားကစားကွင်း၊ လမ်းလျှောက်လမ်းနှင့် ရှုခင်းကြည့်နေရာများကိုပါ ထည့်သွင်းဆောက်လုပ်ထားသည်။ဤစီမံကိန်းအတွက် စုစုပေါင်းကုန်ကျစရိတ် အမေရိကန်ဒေါ်လာ ၆၇.၅ သန်းကျော် ရှိပြီး၊ တောင်ကိုရီးယားနိုင်ငံအစိုးရ၏ စီးပွားရေးဖွံ့ဖြိုးတိုးတက်မှုပူးပေါင်းဆောင်ရွက်ရေးရန်ပုံငွေ (EDCF) ထံမှ အတိုးနှုန်းသက်သာသော ချေးငွေ ဒေါ်လာ ၅၇.၆ သန်းနှင့် လာအိုအစိုးရဘတ်ဂျက် ဒေါ်လာ ၉.၉ သန်းကျော်ဖြင့် ပူးပေါင်းအကောင်အထည်ဖော်ခဲ့ခြင်းဖြစ်သည်။အဆိုပါလမ်းလျှောက်လမ်းသစ်သည် မြို့ခံပြည်သူများနှင့် ကမ္ဘာလှည့်ခရီးသွားများအတွက် အဓိကဆွဲဆောင်ရာ အပန်းဖြေနေရာအသစ်တစ်ခု ဖြစ်လာမည်ဖြစ်သည်။