အမိမြေသို့ ဟောင်ကောင်ပြန်လည်ရောက်ရှိခြင်း ၂၉ နှစ်မြောက် နှစ်ပတ်လည် အထိမ်းအမှတ် အခမ်းအနားများကို တရုတ်နိုင်ငံ ဟောင်ကောင်ဒေသတစ်ခွင်၌ ဇူလိုင်လ ၁ ရက်နေ့တွင် တစ်ရက်တာပတ်လုံး စည်ကားသိုက်မြိုက်စွာ ကျင်းပခဲ့ကြောင်း သိရသည်။ ဝမ်းကျိုင်ခရိုင်ရှိ ဂိုးလ်ဒင်း ဘာအူဟီနီယာရင်ပြင်၌ အလံတင်အခမ်းအနား ပြုလုပ်ခဲ့ပြီးနောက် ဟောင်ကောင် ကွန်ဗင်းရှင်းနှင့် ပြပွဲစင်တာ၌ အထိမ်းအမှတ်ဧည့်ခံပွဲ ဆက်လက်ကျင်းပခဲ့ရာ ဟောင်ကောင်အထူးအုပ်ချုပ်ခွင့်ရဒေသ (HKSAR) အုပ်ချုပ်ရေးမှူး လီကျားချောင်း (ဂျွန်လီ) က ဟောင်ကောင်၏ စီးပွားရေးတိုးတက်မှုကို မြှင့်တင်ကာ ဖွံ့ဖြိုးတိုးတက်မှုအကျိုးကျေးဇူးများကို ပြည်သူများ ပိုမိုမျှဝေခံစားနိုင်စေရန် ဆောင်ရွက်သွားမည်ဟု မိန့်ခွန်းပြောကြားခဲ့သည်။ ထူးခြားချက်အနေဖြင့် ဟောင်ကောင်၏ ပထမဆုံးအာကာသယာဉ်မှူး လီကျားယဉ်က ထျန်းကုန်းအာကာသစခန်းမှနေ၍ ဗီဒီယိုလင့်ခ်ဖြင့် အခမ်းအနားသို့ ချိတ်ဆက်ကာ မွေးရပ်မြေအတွက် ဆုမွန်ကောင်းတောင်းပေးခဲ့သည်။ ထို့ပြင် ဒေသတစ်ခွင်တွင်လည်း အစိုးရရုံးများနှင့် ပညာရေးအဖွဲ့အစည်းများ၏ အလံတင်အခမ်းအနားများအပြင် ဒရုန်းဖြင့် သရုပ်ဖော်တင်ဆက်မှု၊ မြင်းပြိုင်ပွဲများ၊ ဗစ်တိုးရီးယားဆိပ်ကမ်း၌ ငါးဖမ်းရေယာဉ်များ စီတန်းလှည့်လည်မှုနှင့် ဆိပ်ခံတံတား၌ တေးသီချင်းသံပြိုင်သီဆိုဖျော်ဖြေပွဲများ စသည့် ပျော်ပွဲရွှင်ပွဲများကို စည်ကားသိုက်မြိုက်စွာ ထည့်သွင်းကျင်းပခဲ့ကြကြောင်း သိရသည်။
