ရန်ကုန်မြို့၌ ဆိုင်ကယ်များကို ဘေးတွဲပြောင်းလဲအသုံးပြုပါက ထောင်ဒဏ်နှင့် ငွေဒဏ်များဖြင့် ထိရောက်စွာ အရေးယူမည်ဖြစ်

ရန်ကုန်တိုင်းဒေသကြီးအတွင်း ဆိုင်ကယ်များကို ဘေးတွဲတပ်ဆင်၍ ပြောင်းလဲအသုံးမပြုကြရန်နှင့် လိုက်နာခြင်းမရှိပါက အမြင့်ဆုံးထောင်ဒဏ် (၃) နှစ်အထိ ချမှတ်နိုင်သည့် မော်တော်ယာဉ်စီမံခန့်ခွဲမှုဥပဒေဖြင့် အရေးယူမည်ဟု ကုန်းလမ်းပို့ဆောင်ရေးညွှန်ကြားမှုဦးစီးဌာန (ကညန) က သတိပေးထားကြောင်း လိုင်စင်အကျိုးဆောင်များထံမှ သိရသည်။ ဇူလိုင်လ ၁ ရက်နေ့မှစတင်ကာ ရန်ကုန်၌ ဆိုင်ကယ်စီးခွင့်ပြုထားသည့် မြို့နယ်များတွင် လိုင်စင်သက်တမ်းတိုးသူများကို ဘေးတွဲပြောင်းလဲအသုံးမပြုကြောင်း ခံဝန်ကတိစာချုပ် ရေးထိုးခိုင်းနေခြင်း ဖြစ်သည်။အဆိုပါ ခံဝန်ကတိစာချုပ်ကို ဖောက်ဖျက်ပါက ၂၀၂၀ ပြည့်နှစ် မော်တော်ယာဉ်စီမံခန့်ခွဲမှုဥပဒေ ပုဒ်မ ၉၅ အရ ၃ နှစ်ထက်မပိုသော ထောင်ဒဏ်ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်နိုင်ပြီး၊ ပုဒ်မ ၉၆ အရလည်း ကျပ် ၃၀,၀၀၀ ထက်မပိုသော ဒဏ်ငွေ ချမှတ်နိုင်ကြောင်း သိရသည်။