ရှမ်းပြည်နယ်တောင်ပိုင်း ခရိုင် (၈) ခု၌ ယခုနှစ်တွင် ကိုယ်ပိုင်ကျောင်းပေါင်း ၁၀၉ ကျောင်းအထိ ဖွင့်လှစ်ခွင့်ပြုထား

ရှမ်းပြည်နယ်တောင်ပိုင်းရှိ ခရိုင်နှင့် ကိုယ်ပိုင်အုပ်ချုပ်ခွင့်ရဒေသ (၈) ခုတွင် ယခုနှစ်အတွက် ကိုယ်ပိုင်ကျောင်းပေါင်း ၁၀၉ ကျောင်းအထိ ဖွင့်လှစ်ခွင့်ပြုထားကြောင်း ရှမ်းပြည်နယ်ပညာရေးမှူးရုံးထံမှ သိရသည်။ ရှမ်းပြည်တောင်ပိုင်းတွင် ယမန်နှစ်က ကိုယ်ပိုင်ကျောင်း ၉၆ ကျောင်းရှိခဲ့ရာမှ ၃ ကျောင်း ပိတ်သိမ်းခဲ့သဖြင့် ၉၃ ကျောင်းသာ ကျန်ရှိတော့သော်လည်း၊ ယခုနှစ်တွင် မူလတန်း (၁၂) ကျောင်းနှင့် အထက်တန်း (၄) ကျောင်း၊ စုစုပေါင်း ကျောင်းအသစ် ၁၆ ကျောင်း ထပ်မံတိုးလာခဲ့ခြင်းဖြစ်သည်။ အသစ်တိုးလာသည့် ကျောင်းများမှာ တောင်ကြီးတွင် ၆ ကျောင်း၊ နမ့်စန်တွင် ၃ ကျောင်း၊ ကလောတွင် ၂ ကျောင်းနှင့် ကွန်ဟိန်း၊ ဆီဆိုင်၊ ညောင်ရွှေ၊ ပင်လောင်း၊ ဟိုပုံးမြို့နယ်တို့တွင် ၁ ကျောင်းစီ ဖြစ်ကြသည်။ရှမ်းပြည်တောင်ပိုင်းတွင် တောင်ကြီးမြို့နယ်သည် ကိုယ်ပိုင်ကျောင်းအများဆုံး တည်ရှိရာဒေသဖြစ်ပြီး စုစုပေါင်း ၄၉ ကျောင်းရှိကြောင်း သိရသည်။ တောင်ကြီးမြို့နယ်၌ ယခင်က ကိုယ်ပိုင်ကျောင်း ၄၅ ကျောင်းရှိခဲ့သော်လည်း အောင်မြေသစ်ကျောင်းနှင့် Aung Brother ကျောင်းတို့ကို စည်းကမ်းချက်နှင့် ကိုက်ညီမှုမရှိသဖြင့် ပိတ်သိမ်းအရေးယူခဲ့ရာမှ ကျောင်း ၄၃ ကျောင်းသာ ကျန်ရှိခဲ့ပြီး ယခုနှစ် ကျောင်းအသစ် ၆ ကျောင်း ထပ်တိုးလာခြင်းဖြစ်သည်။ ပညာရေးရုံး တာဝန်ရှိသူများအနေဖြင့် ကိုယ်ပိုင်ကျောင်းများ စည်းကမ်းချက်နှင့် ကိုက်ညီမှု ရှိ၊ မရှိကို အချိန်နှင့်တစ်ပြေးညီ လိုက်လံစိစစ်လျက်ရှိကြောင်း သိရသည်။