ရင်ချင်းဆက်အမြွှာမိန်းကလေးများ ခွဲစိတ်အောင်မြင်ပြီး ၁၉ ရက်အကြာ ကျန်းမာစွာ သီးသန့်သွားလာလှုပ်ရှားနိုင်နေပြီဖြစ်

ရန်ကုန်ကလေးဆေးရုံကြီးတွင် ရင်ချင်းဆက်အမြွှာမိန်းကလေးများအား ခွဲစိတ်ခွဲထုတ်ကုသမှု (Separation Surgery) ကို အောင်မြင်စွာ ဆောင်ရွက်ပေးခဲ့ပြီးနောက်၊ ခွဲစိတ်ပြီး ၁၉ ရက်ပြည့်မြောက်ချိန်တွင် ကလေးနှစ်ဦးစလုံး ကျန်းမာရေးအခြေအနေ ကောင်းမွန်လျက်ရှိကာ တစ်ဦးစီ သီးသန့် ပျော်ရွှင်စွာ သွားလာလှုပ်ရှားနိုင်နေပြီဖြစ်ကြောင်း ကျန်းမာရေးဝန်ကြီးဌာနက ထုတ်ပြန်သည်။အဆိုပါ ရင်ချင်းဆက်အမြွှာမိန်းကလေးများကို ပခုက္ကူမြို့နေ အသက် ၃၁ နှစ်အရွယ် မိခင်ဖြစ်သူက ၂၀၂၄ ခုနှစ် ဇန်နဝါရီလ ၈ ရက်တွင် ဗဟိုအမျိုးသမီးဆေးရုံကြီး (မန္တလေး) ၌ ခွဲစိတ်မွေးဖွားခဲ့ခြင်း ဖြစ်သည်။ ကလေးငယ်များ မွေးဖွားချိန်မှစတင်ကာ ကျန်းမာရေးဝန်ကြီးဌာန၏ လမ်းညွှန်ပံ့ပိုးမှုဖြင့် ဗဟိုအမျိုးသမီးဆေးရုံကြီး (မန္တလေး)၊ ခုတင် ၅၅၀ ဆံ့ ကလေးဆေးရုံကြီး (မန္တလေး) နှင့် ကလေးဆေးရုံကြီး (ရန်ကုန်) တို့တွင် အဆင့်ဆင့် အထူးကြပ်မတ် ပြုစုစောင့်ရှောက်မှုများ ပေးအပ်ခဲ့ခြင်းဖြစ်ကြောင်း သိရသည်။