ကမ္ဘောဒီးယားက ၂၀၂၉ တွင် ဖွံ့ဖြိုးမှုအနည်းဆုံးနိုင်ငံစာရင်းမှ ထွက်ရန် ကြိုးပမ်းမည်ဟုဆို

ကမ္ဘောဒီးယား ဝန်ကြီးချုပ် ဟွန်မာနက်က နိုင်ငံအနေဖြင့် ပြည်ပအကူအညီများကိုသာ အမြဲတမ်း မှီခိုမနေနိုင်ကြောင်းနှင့် ၂၀၂၉ ခုနှစ်တွင် ကုလသမဂ္ဂ၏ ဖွံ့ဖြိုးမှုအနည်းဆုံးနိုင်ငံ (LDC) စာရင်းမှ ထွက်ခွာနိုင်ရန် ပြင်ဆင်ရမည်ဖြစ်ကြောင်း ပြောကြားခဲ့သည်။LDC စာရင်းမှ ထွက်လိုက်ပါက အခွန်ကင်းလွတ်ခွင့်နှင့် ကုန်သွယ်ရေးဆိုင်ရာ အထူးအခွင့်အရေးအချို့ ဆုံးရှုံးနိုင်သဖြင့် ရေတိုတွင် စိန်ခေါ်မှုများ ရှိလာနိုင်သည်။ သို့သော်လည်း နိုင်ငံ၏ စီးပွားရေး လွတ်လပ်မှုနှင့် ရေရှည်တိုးတက်မှုအတွက် ယခုအကူးအပြောင်းမှာ မဖြစ်မနေ လိုအပ်သည်ဟု ဝန်ကြီးချုပ်က ဆိုသည်။ အစိုးရအနေဖြင့် နိုင်ငံတကာ အကူအညီများအပေါ် အမှီသဟဲပြုနေရသည့် အခြေအနေမှ လွတ်မြောက်ကာ မိမိခြေထောက်ပေါ်မိမိရပ်တည်ပြီး ၂၀၃၀ တွင် အလယ်အလတ်အထက်ဝင်ငွေရှိသော နိုင်ငံဖြစ်လာစေရန် ရည်မှန်းထားကြောင်း သိရသည်။