ကမ္ဘာ့အမွေအနှစ် ပုဂံဒေသရှိ နှစ်ပေါင်း ၁၀၀၀ ကျော် သက်တမ်းရှိပြီး မသမာသူများ၏ ခိုးယူမှု၊ သဘာဝဘေးနှင့် လူတို့၏ ဖျက်ဆီးမှုများကြောင့် နေ့စဉ်ပျက်စီးဆုံးရှုံးနေရသည့် ရှားပါးနံရံဆေးရေးပန်းချီရှိသော ရှေးဟောင်းအဆောက်အအုံများကို စနစ်တကျ အသေးစိတ်မှတ်တမ်းပြုစုကာ ဦးစားပေးအလိုက် ပြုပြင်ထိန်းသိမ်းမှုများ လုပ်ဆောင်လျက်ရှိသည်။ မြန်မာ့ယဉ်ကျေးမှု ဗိသုကာလက်ရာများနှင့် သမိုင်းဝင်အမွေအနှစ်များကို ကာကွယ်ရန် ရည်ရွယ်၍ ၂၀၂၆ ခုနှစ်အတွင်း ရှေးဟောင်းအဆောက်အအုံ ၅ ဆူကို ရွေးချယ်မှတ်တမ်းတင်နေခြင်းဖြစ်ပြီး၊ အခု ဇွန်လတွင် ရွှေဆံတော်ဘုရား အနောက်တောင်ဘက်ရှိ ၁၃ ရာစု ပုဂံခေတ်နှောင်းပိုင်းလက်ရာ ငဖုန်းသင်ယောင် ဂူဘုရားငယ် (အမှတ် ၁၅၃၆) ကို စတင်ဆောင်ရွက်နေသည်။ အတွင်း၌ တွေ့ရှိရသည့် မင်စာကိုအစွဲပြု၍ ခေါ်တွင်သော အဆိုပါဂူဘုရားအတွင်း၌ စိတ်ဝင်စားဖွယ် စက်ဝန်းပန်းချီများနှင့် ဗုဒ္ဓဘာသာကျမ်းဂန်လာ စကြာဝဠာကြီး တည်ရှိပုံ၊ ဒေသနာတော်များကို သရုပ်ဖော်ထားသည့် နံရံဆေးရေးပန်းချီများကို လေ့လာမြင်တွေ့နိုင်သည်။
