ဂျပန်နိုင်ငံ၊ကျိုတို (Kyoto) ဘူတာရုံတွင် ရထားတစ်စင်း လမ်းချော်မှုဖြစ်ပွား၊ ခရီးသည်များ ထိခိုက်ဒဏ်ရာရရှိမှုမရှိ

ဂျပန်နိုင်ငံအနောက်ပိုင်း ကျိုတို (Kyoto) ဘူတာရုံရှိ ကင်တက်ဆု ရထားလိုင်း (Kintetsu Railway) တွင် ဇွန် ၂၉ ရက် (တနင်္လာနေ့) နံနက် ၅ နာရီ ၁၅ မိနစ်ခန့်က ခရီးသည်တင်ရထားတစ်စင်း လမ်းချော်မှု ဖြစ်ပွားခဲ့သော်လည်း ရထားပေါ်ပါလာသည့် ခရီးသည် ၃၀ ခန့်တွင် ထိခိုက်ဒဏ်ရာရရှိသူ မရှိကြောင်း ရထားလုပ်ငန်းအော်ပရေတာက ထုတ်ပြန်ခဲ့သည်။ ကာရှီဟာရာဂျင်းဂု-မေး (Kashiharajingu-mae) သို့ ဦးတည်မောင်းနှင်မည့် အဆိုပါ တွဲဆိုင်း ၄ တွဲပါ ဒေသန္တရရထား၏ ဒုတိယနှင့် တတိယမြောက် ရထားတွဲများသည် ဘူတာရုံပလတ်ဖောင်းအနီးရှိ ရထားလမ်းလွှဲ (Switch) နေရာတွင် လမ်းချော်ခဲ့ခြင်း ဖြစ်ပုံရပြီး၊ ရထားပေါ်ပါ ခရီးသည်များကို ဘူတာရုံအတွင်းသို့ ခြေကျင်ဖြင့် လုံခြုံစွာ လမ်းညွှန်ခေါ်ဆောင်ခဲ့သည်။ပို့ဆောင်ရေးဝန်ကြီးဌာန၏ အဆိုအရ ရထားမောင်းသူက ကျိုတိုဘူတာမှ မီတာ ၁၂၀ ခန့် မောင်းနှင်ပြီးနောက် ရထားအား နောက်ကနေ ဆွဲထားသကဲ့သို့ ခံစားရသဖြင့် ရထားကို ရပ်တန့်ခဲ့ခြင်းဖြစ်ကြောင်း ကုမ္ပဏီသို့ ပြောကြားခဲ့သည်။ ယခုမတော်တဆမှုကြောင့် ကင်တက်ဆု ကျိုတိုလိုင်း (Kintetsu Kyoto Line) ၏ ကျိုတို (Kyoto) နှင့် ကာမီတိုဘာဂူချီ (Kamitobaguchi) ဘူတာများအကြား ရထားပြေးဆွဲမှုများကို ယာယီရပ်ဆိုင်းထားရပြီး အခြားလမ်းပိုင်းအချို့တွင်လည်း ခရီးစဉ်ကြန့်ကြာမှုများ ဖြစ်ပေါ်ခဲ့ရာ၊ ဂျပန်သယ်ယူပို့ဆောင်ရေးဘေးကင်းလုံခြုံမှုအဖွဲ့ (JTSB) က အဆိုပါနေရာသို့ ရထားမတော်တဆမှု စုံစမ်းစစ်ဆေးရေးမှူး ၂ ဦး စေလွှတ်ကာ အသေးစိတ် စုံစမ်းစစ်ဆေးလျက်ရှိသည်။