ကမ္ဘောဒီးယား၌ ပြည်ပမှ ရိုက်ခတ်မှုများကြောင့် ကုန်ဈေးနှုန်းများ ဆက်လက်မြင့်တက်နေပြီး အခြေခံလူတန်းစားများနှင့် စီးပွားရေးလုပ်ငန်းများ အခက်ကြုံနေရ

ကမ္ဘာ့ပထဝီဝင်နိုင်ငံရေး ပဋိပက္ခများ၊ စွမ်းအင်စျေးကွက် မတည်ငြိမ်မှုများနှင့် သယ်ယူပို့ဆောင်ရေး စရိတ်ကြီးမြင့်မှု စသည့် ပြည်ပမှ ရိုက်ခတ်မှုများကြောင့် ကမ္ဘောဒီးယားနိုင်ငံ၏ ကုန်စျေးနှုန်းများ ဆက်လက်မြင့်တက်နေသည်။ ကမ္ဘောဒီးယားဗဟိုဘဏ် (NBC) ၏ ထုတ်ပြန်ချက်အရ ၂၀၂၆ ခုနှစ် ဧပြီလတွင် နိုင်ငံ၏ ငွေကြေးဖောင်းပွမှုနှုန်း (Inflation rate) သည် ၅.၇၉ ရာခိုင်နှုန်းအထိ ရှိခဲ့သည်။ ဤပမာဏသည် ၂၀၂၅ ခုနှစ်က ရှိခဲ့သည့် ၂.၅ ရာခိုင်နှုန်းထက် နှစ်ဆကျော် မြင့်တက်လာခြင်း ဖြစ်သည်။အထူးသဖြင့် အရှေ့အလယ်ပိုင်း တင်းမာမှုများကြောင့် ကမ္ဘာ့ရေနံစျေးနှုန်း မြင့်တက်လာခြင်းက စက်သုံးဆီ အဓိကတင်သွင်းနေရသည့် ကမ္ဘောဒီးယားနိုင်ငံအပေါ် တိုက်ရိုက်သက်ရောက်မှု ရှိစေခဲ့သည်။ စက်သုံးဆီစျေးနှုန်း မြင့်တက်မှုသည် စိုက်ပျိုးရေးထွက်ကုန်များနှင့် သွင်းကုန်ပစ္စည်းများ၏ သယ်ယူပို့ဆောင်ရေးစရိတ်ကို တိုးစေခဲ့သည်။ ထို့ကြောင့် အခြေခံစားသောက်ကုန်များနှင့် လူသုံးကုန်ပစ္စည်းများ သိသာစွာ စျေးကြီးလာပြီး သာမန်မိသားစုများနှင့် စီးပွားရေးလုပ်ငန်းများ၏ ကုန်ကျစရိတ်ကို ပိုမိုညှစ်ထုတ်သကဲ့သို့ ဖြစ်နေသည်။ လက်ရှိတွင် အစိုးရနှင့် ဗဟိုဘဏ်တို့ ပူးပေါင်းကာ ထိခိုက်လွယ်သော မိသားစုများကို ထောက်ပံ့ရန်နှင့် ဘဏ္ဍာရေးတည်ငြိမ်မှု ထိန်းသိမ်းရန် ကြိုးပမ်းလျက်ရှိကြောင်း သိရသည်။