ချင်းပြည်နယ်၊ တွန်းဇံမြို့နယ်အတွင်းရှိ အခြေခံပညာကျောင်းများကို ဆောက်လုပ်ရေးဝန်ကြီးဌာန ဒုတိယဝန်ကြီး ဦးမျိုးမြင့်က ယမန်နေ့က သွားရောက်ကြည့်ရှုစစ်ဆေးခဲ့ရာ လက်ရှိတွင် မြို့နယ်အတွင်း၌ အခြေခံပညာကျောင်းပေါင်း ၄၄ ကျောင်း ဖွင့်လှစ်နိုင်ခဲ့ပြီး ကျောင်းသား၊ ကျောင်းသူ စုစုပေါင်း ၃၄၄၆ ဦး တက်ရောက်ပညာသင်ကြားလျက်ရှိသည်။ အဆိုပါကျောင်းများအနက် တွန်းဇံမြို့ရှိ အခြေခံပညာအထက်တန်းကျောင်းတွင် ကျောင်းအုပ်ကြီး ၁ ဦး၊ သင်ကြားရေး ဆရာ၊ ဆရာမ ၃၀ ဦးနှင့် ပညာရေးဝန်ထမ်း ၅ ဦး အပါအဝင် စုစုပေါင်းဝန်ထမ်း ၃၆ ဦးဖြင့် သင်ကြားရေးတာဝန်များကို ထမ်းဆောင်ပေးလျက်ရှိပြီး ကျောင်းသား၊ ကျောင်းသူ ၂၆၁ ဦး တက်ရောက်ပညာသင်ယူနေကြောင်း သိရသည်။
