မြန်မာနိုင်ငံ၏ ခရီးစဉ်ဒေသအလှအပများ၊ ယဉ်ကျေးမှုအမွေအနှစ်များနှင့် တိုင်းရင်းသားတို့၏ ရိုးရာဓလေ့ပွဲတော်များကို ကမ္ဘာလှည့်ခရီးသွားများ ပိုမိုသိရှိပြီး လာရောက်လည်ပတ်စေရန်နှင့် ခရီးသွားလုပ်ငန်း ရေရှည်ဖွံ့ဖြိုးတိုးတက်စေရန် ရည်ရွယ်၍ “ခရီးသွားလုပ်ငန်းနှင့် ယဉ်ကျေးမှု” ခေါင်းစဉ်ဖြင့် Short Video ပြိုင်ပွဲတစ်ရပ်ကို ကျင်းပမည်ဖြစ်သည်။ ပြိုင်ပွဲဝင်ဗီဒီယိုများကို ဇွန်လ ၂၉ ရက်မှစတင်၍ ဩဂုတ် ၂၁ ရက် နေ့လယ် ၃ နာရီနောက်ဆုံးထားကာ နေပြည်တော်၊ ဥတ္တရသီရိမြို့နယ်ရှိ ဟိုတယ်နှင့်ခရီးသွားညွှန်ကြားမှုဦးစီးဌာနသို့ ပေးပို့ရမည်ဖြစ်ပြီး ဆုရရှိသည့် ဗီဒီယိုများကို စက်တင်ဘာ ၂၇ ရက်တွင် ကျင်းပမည့် ကမ္ဘာ့ခရီးသွားလုပ်ငန်းနေ့ အထိမ်းအမှတ်အခမ်းအနား၌ ခင်းကျင်းပြသကာ ဆုများချီးမြှင့်သွားမည်ဖြစ်သည်။ ဆုကြေးများအနေဖြင့် ပထမဆု ငွေကျပ် ၁၅ သိန်း၊ ဒုတိယဆု ငွေကျပ် ၁၂ သိန်း၊ တတိယဆု ငွေကျပ် ၁၀ သိန်းနှင့် ငွေကျပ် ၃ သိန်းစီ ချီးမြှင့်မည့် နှစ်သိမ့်ဆု ၅ ဆုအထိ သတ်မှတ်ထားရှိထားကြောင်း သိရသည်။
