စင်ကာပူ၌ ကွန်ဒို စီမံခန့်ခွဲရေးအဖွဲ့များအနေဖြင့် ပိုင်ရှင်များ၏ အခန်းငှားရမ်းခွင့်ကို ပိတ်ပင်တားဆီးပိုင်ခွင့်မရှိကြောင်း အာဏာပိုင်အဖွဲ့ ထုတ်ပြန်

စင်ကာပူနိုင်ငံ၏ မြို့ပြဖွံ့ဖြိုးတိုးတက်ရေးအာဏာပိုင်အဖွဲ့ (URA) နှင့် အိမ်ရာတည်ဆောက်ရေးအာဏာပိုင်များက ပုဂ္ဂလိက ကွန်ဒိုမီနီယံ အဆောက်အအုံများရှိ စီမံခန့်ခွဲရေးကော်မတီများ (MCST) အနေဖြင့် ၎င်းတို့ကိုယ်ပိုင် ပြဋ္ဌာန်းထားသည့် စည်းကမ်းချက်များ (By-laws) ကို အသုံးချ၍ အခန်းပိုင်ရှင်များ၏ တရားဝင် အိမ်ရာငှားရမ်းခွင့်ကို ကန့်သတ်ခြင်း သို့မဟုတ် တားဆီးပိတ်ပင်ခြင်းများ မပြုလုပ်နိုင်ကြောင်း ရှင်းလင်းထုတ်ပြန်ခဲ့သည်။မကြာသေးမီက ကွန်ဒိုစီမံခန့်ခွဲရေးအဖွဲ့အချို့သည် လုံခြုံရေးနှင့် အများပြည်သူဆိုင်ရာ အဆောက်အအုံ ဝန်ပိမှုများကို အကြောင်းပြ၍ အခန်းပိုင်ရှင်များအနေဖြင့် ၎င်းတို့၏ ယူနစ်များကို ပြင်ပလူများထံ ငှားရမ်းရာတွင် တင်းကျပ်သော စည်းကမ်းများ ချမှတ်ခြင်း သို့မဟုတ် ငှားရမ်းခွင့် မပြုခြင်းတို့ လုပ်ဆောင်လာသည့်အတွက် အငြင်းပွားမှုများ ဖြစ်ပွားခဲ့ရာမှ အစိုးရက ယခုကဲ့သို့ တရားဝင် အသိပေးချက် ထုတ်ပြန်လာခြင်း ဖြစ်သည်။ တည်ဆဲဥပဒေအရ စင်ကာပူတွင် ပုဂ္ဂလိက အိမ်ရာများကို အနည်းဆုံး ၃ လ သက်တမ်းဖြင့် တရားဝင် ငှားရမ်းခွင့်ပြုထားပြီး ဖြစ်သောကြောင့် ကွန်ဒိုကော်မတီများအနေဖြင့် အစိုးရ၏ မူဝါဒထက်ကျော်လွန်၍ အခန်းပိုင်ရှင်များ၏ အိမ်ခြံမြေဆိုင်ရာ ပိုင်ဆိုင်ခွင့်နှင့် စီးပွားရေးအရ အကျိုးအမြတ်ရှာဖွေခွင့် ဥပဒေပါ အခွင့်အရေးများကို လျှော့ချပိတ်ပင်၍မရကြောင်း ဥပဒေကြောင်းအရ ပြတ်ပြတ်သားသား သတိပေးထားသည်။