၂၀၂၆ ခုနှစ် တက္ကသိုလ်ဝင်စာမေးပွဲတွင် လူမှုဝန်ထမ်းဦးစီးဌာနအောက်ရှိ သင်တန်းကျောင်းများနှင့် မသန်စွမ်းကျောင်းများမှ ကြည့်မြင်တိုင်မျက်မမြင်ကျောင်းမှ အမြင်အာရုံမသန်စွမ်းသူ ၂ ဦး၊ ကျိုက်ဝိုင်းလူငယ်သင်တန်းကျောင်းမှ ၃ ဦး၊ မန္တလေးလူငယ်သင်တန်းကျောင်းမှ ၄ ဦး၊ အမျိုးသမီးကလေးများသင်တန်းကျောင်း (မန္တလေး) မှ ၁ ဦးနှင့် လပွတ္တာလူငယ့်အားမာန်သင်တန်းကျောင်းမှ ၁ ဦးတို့ အောင်မြင်ခဲ့ကြောင်း မြန်မာနိုင်ငံအမျိုးသားလူ့အခွင့်အရေးကော်မရှင်မှ သိရသည်။ အလားတူ အကျဉ်းဦးစီးဌာနအောက်ရှိ အင်းစိန်ဗဟိုအကျဉ်းထောင်မှ အကျဉ်းသား ၃၆ ဦး (၁၀၀ ရာခိုင်နှုန်းအောင်ချက်ဖြင့် ၅ နှစ်ဆက်တိုက်အောင်မြင်မှုစံချိန်) နှင့် မန္တလေးဗဟိုအကျဉ်းထောင်မှ အကျဉ်းသား ၁၀ ဦး၊ စုစုပေါင်း အကျဉ်းသား ၄၆ ဦး အောင်မြင်ခဲ့ပြီး ၎င်းတို့အနက် သုံးဘာသာဂုဏ်ထူးရှင် ၅ ဦး၊ နှစ်ဘာသာဂုဏ်ထူးရှင် ၆ ဦးနှင့် တစ်ဘာသာဂုဏ်ထူးရှင် ၆ ဦး ပါဝင်ခဲ့သည်။ ယခုနှစ် ဇွန်လ ၂၈ ရက်တွင် ထုတ်ပြန်ခဲ့သည့် တက္ကသိုလ်ဝင်စာမေးပွဲတွင် တစ်နိုင်ငံလုံးအတိုင်းအတာဖြင့် အောင်ချက်ရာခိုင်နှုန်း ၅၂.၃၇ ရာခိုင်နှုန်း ရှိခဲ့သည်။
