ဂျပန်နိုင်ငံ၊ အိုင်ဝါတေး (Iwate) ကမ်းလွန်တွင် ယနေ့ အင်အား ၆.၁ အဆင့်ရှိ ငလျင်တစ်ခု ထပ်မံလှုပ်ခတ်၊ ဆူနာမီသတိပေးချက် ထုတ်ပြန်ထားခြင်းမရှိ

ဂျပန်နိုင်ငံမြောက်ပိုင်း အိုင်ဝါတေး (Iwate) စီရင်စုကမ်းလွန်ပင်လယ်ပြင်၌ ယနေ့ ဇွန် ၂၈ ရက် (တနင်္ဂနွေနေ့) နံနက် ၅ နာရီ ၂၁ မိနစ်ခန့်တွင် ပမာဏ (Magnitude) ၆.၁ အဆင့်ရှိ ပြင်းထန်သော မြေငလျင်တစ်ခု ထပ်မံလှုပ်ခတ်သွားခဲ့ရာ အိမ်နီးချင်း အိုအိုမိုရီ (Aomori) စီရင်စုရှိ ဟာချီနိုဟေး (Hachinohe) မြို့တွင် ဂျပန်ငလျင်တိုင်းတာမှုစံနှုန်း (Shindo) အရ အဆင့် ၅ (အောက်) အထိ ခံစားခဲ့ရသော်လည်း အာဏာပိုင်များက ဆူနာမီရေလှိုင်းသတိပေးချက် ထုတ်ပြန်ခဲ့ခြင်း မရှိပါ။ ဂျပန်မိုးလေဝသနှင့် ဇလဗေဒအေဂျင်စီ (JMA) ၏ ထုတ်ပြန်ချက်အရ အဆိုပါငလျင်သည် မြေအောက်အနက် ၄၀ ကီလိုမီတာခန့်ကို ဗဟိုပြုလှုပ်ခတ်ခဲ့ခြင်းဖြစ်ပြီး၊ လွန်ခဲ့သည့် သုံးရက် (ဇွန် ၂၅ ရက်) က ထိုဒေသအနီးမှာပင် လှုပ်ခတ်ခဲ့သည့် ပမာဏ ၇.၂ အဆင့်ရှိ အင်အားပြင်းငလျင်ကြီး၏ နောက်ဆက်တွဲငလျင်တစ်ခု ဖြစ်နိုင်ကြောင်း သိရသည်။ ဝန်ကြီးချုပ် ဆာနာအဲ တာကာအီချီ (Sanae Takaichi) က အိုင်ဝါတေးဒေသတစ်ဝိုက်တွင် ငလျင်များ ဆက်တိုက်လှုပ်ခတ်နေခြင်းကြောင့် ထိခိုက်ပျက်စီးမှု အခြေအနေများကို အမြန်ဆုံး အကဲဖြတ်ရန်နှင့် ပြည်သူများထံ အချိန်နဲ့တစ်ပြေးညီ တိကျမှန်ကန်သော သတင်းအချက်အလက်များ ထုတ်ပြန်ပေးရန် ညွှန်ကြားထားပြီး၊ ပြည်သူများအနေဖြင့် လာမည့်ရက်ပိုင်းအတွင်း အင်အားပြင်းငလျင်များ ထပ်မံလှုပ်ခတ်လာနိုင်ခြေ ရှိသဖြင့် သတိမလွတ်ဘဲ အမြဲတမ်း နိုးနိုးကြားကြားရှိနေကြရန် တိုက်တွန်းနှိုးဆော်ထားသည်။