တိုင်းနှင့်ပြည်နယ်ရေကူးပြိုင်ပွဲတွင် ရန်ကုန်တိုင်းဒေသကြီးအသင်း စုပေါင်းတံခွန်စိုက်ဆုဖလား ဆွတ်ခူး

ရန်ကုန်မြို့၌ ဇွန်လ ၂၄ ရက်နှင့် ၂၅ ရက်တို့က ကျင်းပခဲ့သည့် ၂၀၂၆ ခုနှစ် တိုင်းနှင့်ပြည်နယ် ရေကူးပြိုင်ပွဲတွင် ရန်ကုန်တိုင်းဒေသကြီးအသင်းက အမျိုးသားတံခွန်စိုက်ဆုဖလား (ရမှတ် ၁၂၅ မှတ်) နှင့် အမျိုးသမီးတံခွန်စိုက်ဆုဖလား (ရမှတ် ၁၂၈ မှတ်) တို့ဖြင့် စုပေါင်းတံခွန်စိုက်ဆုဖလားကို ဆွတ်ခူးရရှိခဲ့ကြောင်း သိရသည်။ ပြိုင်ပွဲအပြီး ပိတ်ပွဲနှင့် ဆုချီးမြှင့်ပွဲအခမ်းအနားတွင် မြန်မာနိုင်ငံအိုလံပစ်ကော်မတီ ဒု-ဥက္ကဋ္ဌ၊ အားကစားနှင့်လူငယ်ရေးရာဝန်ကြီးဌာန ဒု-ဝန်ကြီး ဦးညီညီနှင့် တာဝန်ရှိသူများက ပြိုင်ပွဲအမျိုးအစားအလိုက် ဆုရရှိကြသည့် အားကစားသမားများနှင့် အသင်းများအား ဆုဖလား၊ ဆုတံဆိပ်များနှင့် ငွေသားဆုများကို ပေးအပ်ချီးမြှင့်ခဲ့ကြကြောင်း သိရသည်။