ပဲခူးတွင်အိုးဝေပိုင်ရှင်ကို ဓားဖြင့်ထောက် ကြိုးတုတ်၍ အိုးဝေလုယူမောင်းနှင်သွားသူနှစ်ဦးကို ပုဒ်မ ၃၈၆/၁၁၄ ဖြင့် အမှုဖွင့်စစ်ဆေး

ပဲခူးတိုင်း၊ ပဲခူးမြို့နယ်တွင် ဇွန်လ ၂၃ ရက် ညပိုင်းက အိုးဝေ (သုံးဘီးဆိုင်ကယ်) မောင်းနှင်သူအား အမျိုးသားနှစ်ဦးက ကလိကားဝင်းသို့ လိုက်ပို့ရန် ငှားရမ်းခဲ့ပြီးနောက် ပြည်တော်အေးကျေးရွာအကျော် ဓာတ်မြေဩဇာဂိုဒေါင်ရှေ့အရောက်တွင် လည်ပင်းကို ဓားဖြင့်ထောက်၊ ခြေထောက်ကို ကြိုးဖြင့်တုတ်ကာ အိုးဝေယာဉ်အား လုယူမောင်းနှင်ထွက်ပြေးသွားခဲ့ကြောင်း သိရသည်။ အဆိုပါဖြစ်စဉ်နှင့်ပတ်သက်၍ အိုးဝေယာဉ်အား လုယက်သွားသူ အမျိုးသားနှစ်ဦးကို သက်ဆိုင်ရာရဲစခန်းက ရာဇသတ်ကြီးပုဒ်မ ၃၈၆/၁၁၄ (ညှဉ်းပန်းနှိပ်စက်၍ဖြစ်စေ၊ သေဘေးဖြစ်စေလျက် ခြောက်လှန့်တောင်းယူမှု/ အားပေးကူညီမှု) တို့ဖြင့် အမှုဖွင့်ကာ စစ်ဆေးအရေးယူလျက်ရှိကြောင်း သိရသည်။