ရန်ကုန်တိုင်း၊ ဒဂုံမြို့နယ်ရှိ သုခဒဂုံအိမ်ရာမှ အခန်းများကို မဲနှိုက်စနစ်ဖြင့် ပြန်လည်ချထားပေးမည်ဟုဆို

ရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း)မြို့နယ်ရှိ သုခဒဂုံ ပြည်သူ့အငှားအိမ်ရာတွင် စည်းကမ်းပျက်သဖြင့် ပြန်လည်သိမ်းဆည်းထားသည့် အိမ်ခန်းများနှင့် အသစ်ထပ်မံပြီးစီးသည့် အိမ်ခန်းများကို တန်းစီဇယားအလိုက် ဇွန်လ ၂၈ ရက် နံနက် ၁၀ နာရီတွင် မဲနှိုက်ပေးသွားမည်ဖြစ်ကြောင်း မြို့ပြနှင့်အိမ်ရာဖွံ့ဖြိုးရေးဦးစီးဌာနက ထုတ်ပြန်သည်။ ယခုတစ်ကြိမ်တွင် အသစ်ပြီးစီးသည့် တိုက် ၃ လုံးမှ အခန်း ၄၈ ခန်းအပြင် စည်းကမ်းဖောက်ဖျက်၍ ပြန်သိမ်းထားသော အခန်းများကိုပါ မဲနှိုက်ပေးသွားမည်ဖြစ်ပြီး၊ မဲနှိုက်ခွင့်ရရှိသူများကို သက်ဆိုင်ရာ အထွေထွေအုပ်ချုပ်ရေးဦးစီးဌာနများနှင့် ဖုန်းဆက်သွယ်မှုများမှတစ်ဆင့် အသိပေးသွားမည်ဖြစ်သည်။ အဆိုပါအိမ်ရာသည် နေရေးအခက်အခဲရှိသည့် ပြည်သူများ၊ တာဝန်ထမ်းဆောင်ဆဲနှင့် အငြိမ်းစားဝန်ထမ်းများကို ၅ နှစ် သက်တမ်းဖြင့် ငှားရမ်းနေထိုင်ခွင့်ပြုထားခြင်းဖြစ်သော်လည်း အချို့မှာ ကိုယ်တိုင်မနေဘဲ ထပ်ဆင့်ငှားခြင်း၊ ခွင့်ပြုချက်မရှိဘဲ ဥပဒေမဲ့ လက်ညှိုးထိုးရောင်းစားခြင်းများ လုပ်ဆောင်ခဲ့ကြသည်။ ထိုသို့ နိုင်ငံပိုင်အခန်းများကို ရောင်းစားခဲ့သူများနှင့် ပူးပေါင်းပါဝင်သူများကို တရားစွဲဆိုခဲ့ရာ တရားရုံးက ပြည်သူပိုင်ပစ္စည်းကာကွယ်ရေးဥပဒေ ပုဒ်မ ၆(၁) အရ အလုပ်နှင့် ထောင်ဒဏ် ၁ နှစ် ကျခံစေခဲ့ပြီး၊ ဝန်ထမ်းဌာနကလည်း အိမ်ခန်းငှားရမ်းခွင့်ပယ်ဖျက်ကာ အခန်းများကို ပြန်လည်သိမ်းဆည်းခဲ့ခြင်းဖြစ်ကြောင်း သိရသည်။