ဗီယက်နမ်ပြည်သူ့ရေတပ် ကွပ်ကဲရေးမှူး ဒုတိယဗိုလ်ချုပ်ကြီး ထရန်သန်းငြင်း (Tran Thanh Nghiem) နှင့် အမေရိကန် ရေတပ်အာဏာပိုင်အဖွဲ့တို့သည် ဟိုင်ဖုန်း (Hai Phong) မြို့၌ တွေ့ဆုံဆွေးနွေးခဲ့ကြပြီး နှစ်နိုင်ငံ ရေတပ်အကြား ချစ်ကြည်ရေးနှင့် ထိရောက်သော ပူးပေါင်းဆောင်ရွက်မှုများကို ပိုမိုတိုးမြှင့်လုပ်ဆောင်သွားရန် ကတိပြုခဲ့ကြသည်။
ဆွေးနွေးပွဲတွင် ဗီယက်နမ်ဘက်မှ မကြာသေးမီနှစ်များအတွင်း နှစ်နိုင်ငံရေတပ်အကြား လက်တွေ့ကျကျ ပူးပေါင်းဆောင်ရွက်နိုင်ခဲ့မှုများကို အလေးအနက်ပြောကြားခဲ့ပြီး ဗီယက်နမ်ရေတပ်အရာရှိများအား အမေရိကန်နှင့် ဒေသတွင်းနိုင်ငံများတွင် ကျင်းပသည့် ဘက်စုံညီအစည်းအဝေးများ၊ နှီးနှောဖလှယ်ပွဲများ၊ စစ်ရေးလေ့ကျင့်မှုများနှင့် သင်တန်းများ၌ ပါဝင်တက်ရောက်နိုင်ခွင့် ပံ့ပိုးပေးခဲ့သည့်အတွက် အမေရိကန်ကာကွယ်ရေးဝန်ကြီးဌာနကို ကျေးဇူးတင်ရှိကြောင်း ဖော်ပြခဲ့သည်။ ထို့ပြင် နောင်တွင်လည်း ကိုယ်စားလှယ်အဖွဲ့များ အပြန်အလှန်စေလွှတ်ခြင်း၊ ပညာရေးနှင့် ကျွမ်းကျင်မှုဆိုင်ရာ လေ့ကျင့်ရေးသင်တန်းများ တိုးချဲ့ခြင်းတို့တွင် ဆက်လက်ပူးပေါင်းရန် အဆိုပြုခဲ့သည်။အမေရိကန်ရေတပ်ဘက်မှလည်းဗီယက်နမ်၏ နွေးထွေးသော ကြိုဆိုမှုကို ကျေးဇူးတင်ရှိကြောင်းနှင့် ရေကြောင်းလုံခြုံရေးအပါအဝင် ကာကွယ်ရေးကဏ္ဍများတွင် ပူးပေါင်းဆောင်ရွက်မှု အားကောင်းလာစေရန် အပြည့်အဝ ထောက်ခံအားပေးသွားမည်ဖြစ်ကြောင်း ပြန်လည်ပြောကြားခဲ့သည်။
