မက္ကဆီကိုအသင်း၏ ဝါရင့်ဂိုးသမား အိုချူအာသည် ကမ္ဘာ့ဖလားပြိုင်ပွဲသမိုင်းတစ်လျှောက် မက္ကဆီကိုလက်ရွေးစင်အသင်းအတွက် အသက်အကြီးဆုံး ကစားသမားအဖြစ် မှတ်တမ်းသစ်ရေးထိုးနိုင်ခဲ့ကြောင်း သိရသည်။အိုချူအာသည် ချက်အသင်းကို ၃-၀ ဂိုးဖြင့် အနိုင်ရရှိခဲ့သည့်ပွဲစဉ်၏ မိနစ် ၇၈ တွင် လူစားဝင်ကစားသမားအဖြစ် ပါဝင်လာခဲ့ပြီးနောက် အသက် ၄၀ နှစ်နှင့် ၃၄၆ ရက်ဖြင့် ယခင်က စံချိန်တင်ထားသည့် ဝါရင့်နောက်ခံလူ ရာဖေးလ်မားကွက်ဇ်၏ စံချိန် (၃၉ နှစ်နှင့် ၁၃၉ ရက်) ကို ကျော်ဖြတ်ကာ အသက်အကြီးဆုံး ကစားသမား ဖြစ်လာခဲ့ခြင်းဖြစ်သည်။ ထို့ပြင် ၎င်းသည် ကမ္ဘာ့ဖလားပြိုင်ပွဲကို ၆ ကြိမ်အထိ ဆင်နွှဲခွင့်ရရှိခဲ့သည့် သမိုင်းတစ်လျှောက် ပထမဆုံးသော ဂိုးသမားအဖြစ်လည်း မှတ်တမ်းဝင်ခဲ့သည်။၎င်းသည် ၂၀၀၆ နှင့် ၂၀၁၀ ကမ္ဘာ့ဖလားပြိုင်ပွဲများတွင် ပါဝင်ခွင့်ရသော်လည်း ပွဲထွက်ကစားခွင့် မရရှိခဲ့ဘဲ ၂၀၁၄၊ ၂၀၁၈ နှင့် ၂၀၂၂ ပြိုင်ပွဲများတွင်မူ အသင်း၏ နံပါတ်တစ်အဓိကဂိုးသမားအဖြစ် ပါဝင်ခဲ့သူဖြစ်သည်။ ယခုပြိုင်ပွဲတွင် အရန်ဂိုးသမားအဖြစ်သာ ပါဝင်နေသည့် အိုချူအာကို ချက်အသင်းနှင့်ပွဲမတိုင်မီ ပွဲထွက်ခွင့်ပေးရန် တောင်းဆိုမှုများရှိခဲ့သော်လည်း နည်းပြဖြစ်သူက လူစားဝင်ကစားသမားအဖြစ်သာ အသုံးပြုခဲ့ပြီး လက်ရှိတွင် ၎င်း၏ ကမ္ဘာ့ဖလားပွဲအရေအတွက်မှာ ၁၁ ပွဲအထိ ရှိလာခဲ့ပြီဖြစ်ကြောင်း သိရသည်။
