ဂျပန်၌ အငြိမ်းစားအရွယ် ဧည့်လမ်းညွှန်များ တိုးပွားလာခြင်းက သက်ကြီးလူ့အဖွဲ့အစည်း၏ ပုံရိပ်သစ်ကို ဖော်ညွှန်းနေ

ကမ္ဘာပေါ်တွင် သက်ကြီးရွယ်အို ဦးရေအများဆုံးနိုင်ငံတစ်ခုဖြစ်သည့် ဂျပန်နိုင်ငံတွင် အခြားနိုင်ငံတကာခရီးသွားများကို လိုက်လံပို့ဆောင်ပေးသည့် အသက် ၆၀၊ ၇၀ နှင့် ထို့ထက်ကျော်လွန်သော အငြိမ်းစားယူရမည့်အရွယ် ဧည့်လမ်းညွှန် (Tour Guide) များ ပိုမိုတိုးပွားလျက်ရှိသည်။ လက်ရှိတွင် ဂျပန်လူဦးရေ၏ သုံးပုံတစ်ပုံနီးပါးသည် အသက် ၆၅ နှစ်နှင့်အထက် ဖြစ်နေပြီး စံချိန်တင် သက်ကြီးရွယ်အို ၉.၃ သန်းကျော်သည် လုပ်ငန်းခွင်အတွင်း ဆက်လက်ရှိနေကြဆဲဖြစ်သည်။၎င်းသက်ကြီးဧည့်လမ်းညွှန်များအနက် အချို့မှာ အသက်မွေးဝမ်းကျောင်း စီးပွားရေးအရ အပိုဝင်ငွေရရှိရန် လုပ်ကိုင်ကြခြင်းဖြစ်ပြီး၊ အချို့မှာမူ မိမိတို့၏ အတွေ့အကြုံများနှင့် ဘာသာစကားကျွမ်းကျင်မှုများကို အသုံးချကာ နိုင်ငံခြားသား ဧည့်သည်များကို ကူညီလိုသည့် စေတနာအကျိုးပြုစိတ်ဓာတ်ဖြင့် ပါဝင်လုပ်ကိုင်နေကြခြင်း ဖြစ်သည်။ ဤဖြစ်စဉ်သည် သက်ကြီးရွယ်အိုများအနေဖြင့် လူ့အဖွဲ့အစည်းအတွင်း မိမိတို့၏ စွမ်းဆောင်ရည်များကို ဆက်လက်ထုတ်ဖော်ရင်း တစ်ကိုယ်တည်း အထီးကျန်ဖြစ်မသွားစေဘဲ အဓိပ္ပာယ်ရှိပြီး တက်ကြွသော လူနေမှုဘဝပုံစံသစ်ကို ဖန်တီးနိုင်ကြောင်း သက်သေပြလျက်ရှိသည်။