လာအို - ထိုင်း-ဗီယက်နမ် ၃နိုင်ငံ ကုန်သွယ်ရေးစင်္ကြံကို မြှင့်တင်ရန် အမျိုးသားအဝေးပြေးလမ်းမကြီး အမှတ် (၂) ကို လာအိုအစိုးရ အဆင့်မြှင့်တင်နေ

လာအိုနိုင်ငံသည် ပြည်မကြီးအရှေ့တောင်အာရှတစ်ခွင် ဒေသတွင်းကုန်သွယ်ရေးနှင့် သယ်ယူပို့ဆောင်ရေး ချိတ်ဆက်မှုများကို ပိုမိုအားကောင်းစေရန်အတွက် ထိုင်း၊ လာအိုနှင့် ဗီယက်နမ်နိုင်ငံတို့ကို အဓိကချိတ်ဆက်ပေးထားသည့် အမျိုးသားအဝေးပြေးလမ်းမကြီး အမှတ် ၂ (National Road 2) ကို အာဆီယံစံချိန်စံညွှန်းမီ လမ်းမကြီးအဖြစ် အဆင့်မြှင့်တင်လျက်ရှိသည်။ ၂၀၂၅ ခုနှစ်အစောပိုင်းကတည်းက စတင်ခဲ့သည့် ယခုလမ်းပိုင်း ပြုပြင်ထိန်းသိမ်းမှု စီမံကိန်းအတွက် ယူရို ၁၅၀.၄ သန်း (အမေရိကန်ဒေါ်လာ ၁၇၂ သန်းကျော်) ဘတ်ဂျက်အသုံးပြုထားကြောင်း ဥရောပသမဂ္ဂ (EU) ၏ ဝက်ဘ်ဆိုက်တွင် ဖော်ပြထားသည်။အဆိုပါ စီမံကိန်းကို ကမ္ဘာ့ဘဏ် (World Bank) က ရန်ပုံငွေပံ့ပိုးပေးထားပြီး ဥရောပရင်းနှီးမြှုပ်နှံမှုဘဏ် (EIB)၊ EU နှင့် လာအိုအစိုးရတို့က ပူးတွဲဘဏ္ဍာငွေ စိုက်ထုတ်ပေးထားခြင်း ဖြစ်သည်။ အနောက်ဘက်လမ်းပိုင်း (National Road 2W) ဖြစ်သော ဥဒုံဆိုင် (Oudomxay) ပြည်နယ် ဆိုင် (Xay) ခရိုင်မှ ပက်ဘန်း (Pak Beng) ခရိုင်အထိ ၁၃၆ ကီလိုမီတာ ရှည်လျားသော လမ်းပိုင်းပြန်လည်ပြုပြင်ခြင်းလုပ်ငန်းမှာ လက်ရှိတွင် ၂၀ ရာခိုင်နှုန်းကျော် ပြီးစီးနေပြီဖြစ်သည်။ ထို့အတူ အရှေ့ဘက်လမ်းပိုင်း (National Road 2E) ဖြစ်သည့် ဖုန်ဆာလီ (Phongsaly) ပြည်နယ် ခွာ (Khua) ခရိုင်အထိ ၉၉ ကီလိုမီတာ လမ်းပိုင်းကိုလည်း အဆင့်ဆင့် အကောင်အထည်ဖော် ဆောင်ရွက်နေပြီဖြစ်သည်။စုစုပေါင်း ကီလိုမီတာ ၃၀၀ နီးပါး ရှည်လျားမည့် ဤလမ်းကြောင်းကြီး ရာနှုန်းပြည့် ပြီးစီးသွားပါက ထိုင်းနိုင်ငံ နန် (Nan) ပြည်နယ်ရှိ နယ်စပ်ဂိတ်မှတစ်ဆင့် လာအိုနိုင်ငံ ဆေယာဘူရီ (Xayabouly) ပြည်နယ်ကို ဖြတ်သန်းကာ ဗီယက်နမ်နယ်စပ်ဖြစ်သော ဖုန်ဆာလီပြည်နယ်ရှိ ပန်ဟုတ်-တေးထရန်း (Panghok-Tay Trang) ဂိတ်အထိ တိုက်ရိုက်ချိတ်ဆက်ပေးနိုင်မည်ဖြစ်သည်။ ထို့ပြင် ယခုလမ်းမကြီးသည် ဥဒုံဆိုင်ပြည်နယ်ရှိ လာအို-တရုတ် ရထားလမ်းနှင့်လည်း လမ်းဆုံအဖြစ် ဖြတ်သန်းသွားမည်ဖြစ်ရာ နောင်တွင် တရုတ်၊ လာအို၊ ထိုင်းနှင့် ဗီယက်နမ် ၄ နိုင်ငံလုံးကို ချိတ်ဆက်ပေးမည့် ရာသီဥတုဒဏ်ခံ ဒေသတွင်း သယ်ယူပို့ဆောင်ရေး ကုန်စည်စင်္ကြံကြီးတစ်ခု ဖြစ်လာတော့မည် ဖြစ်သည်။