ကမ္ဘောဒီးယား နိုင်ငံခြားရေးနှင့် နိုင်ငံတကာပူးပေါင်းဆောင်ရွက်ရေးဝန်ကြီးဌာနက ထိုင်းနိုင်ငံပိုင်နက်နှင့် အငြင်းပွားနေသည့် နယ်စပ်ဒေသအချို့တွင် ထိုင်းစစ်တပ်၏ အချုပ်အခြာအာဏာ ချိုးဖောက်စွက်ဖက်သည့် လုပ်ရပ်အသစ်များနှင့် ပတ်သက်၍ ဇွန်လ ၂၂ ရက်နေ့တွင် တရားဝင် သံတမန်ကြောင်းအရ ပြင်းထန်စွာ ကန့်ကွက်လွှာ (Formal protest) ပေးပို့ခဲ့သည်။
ကမ္ဘောဒီးယားအစိုးရ၏ ထုတ်ပြန်ချက်အရ ဇွန်လ ၁၇ ရက်နေ့တွင် ထိုင်းလက်နက်ကိုင်တပ်ဖွဲ့များသည် ပိုဆတ် (Pursat) ပြည်နယ်ရှိ သမာဒါ (Thmar Da) နိုင်ငံတကာနယ်စပ်ဂိတ်အနီး ကမ္ဘောဒီးယားပိုင်နက်အတွင်းသို့ ဝင်ရောက်ကာ ထိုင်းနိုင်ငံတော်အလံများကို စိုက်ထူလွှင့်ထူခဲ့ကြောင်း သိရသည်။ ထို့အပြင် ဥဒ္ဒရမိန်းချေ (Oddar Meanchey) ပြည်နယ်ရှိ ဆမ်ရွန်မြို့နယ်၊ အိုစမတ် (O'Smach) ကျေးရွာရှိ ကမ္ဘောဒီးယားပိုင် Royal O'Smach ဟိုတယ်ဝင်းအတွင်း ထိုင်းစစ်တပ်က တရားမဝင်ဝင်ရောက်စီးနင်းထားသည့် ဂိုဒေါင်တစ်ခုကိုလည်း တမင်သက်သက် မီးရှို့ဖျက်ဆီးမှုများ ပြုလုပ်ခဲ့ကြောင်း စွပ်စွဲထားသည်။ ၎င်းအပြင် တာကရတ်ဗေ (Ta Krabey) ဘုရားကျောင်းအနီးတွင်လည်း ထိုင်းဘက်က ခြံစည်းရိုးများ လာရောက်ခတ်ခဲ့ကြောင်း ဖော်ပြထားသည်။
ကမ္ဘောဒီးယားအစိုးရက ဤလုပ်ရပ်များသည် သမိုင်းဝင် ပြင်သစ်-စီယမ် သဘောတူညီချက်အရ ရေးဆွဲထားသော ၁:၂၀၀,၀၀၀ စကေးမြေပုံများကို အခြေခံသည့် ကမ္ဘောဒီးယား၏ အချုပ်အခြာအာဏာနှင့် နယ်မြေတည်တံ့ခိုင်မြဲမှုကို ပြောင်ပြောင်တင်းတင်း ချိုးဖောက်ခြင်းဖြစ်ကြောင်း၊ ပြီးခဲ့သည့် ၂၀၂၅ ခုနှစ် ဒီဇင်ဘာလက ချမှတ်ခဲ့သည့် နှစ်နိုင်ငံ အထူးနယ်စပ်ကော်မတီ (GBC) ၏ အခြေအနေလျှော့ချရေးဆိုင်ရာ ပူးတွဲကြေညာချက်ပါ သဘောတူညီချက်များကိုလည်း ပျက်ပြားစေကြောင်း ထောက်ပြထားသည်။ သို့ဖြစ်ရာ တင်းမာမှုများ လျော့ကျစေရန်နှင့် အပြန်အလှန်ယုံကြည်မှု တည်ဆောက်နိုင်ရန်အတွက် ထိုင်းအစိုးရအနေဖြင့် နယ်စပ်တစ်လျှောက် တရားမဝင် ဝင်ရောက်လုပ်ဆောင်မှုများကို ချက်ချင်းရပ်တန့်ရန် ကမ္ဘောဒီးယားဘက်က တောင်းဆိုထားသည်။
