ဗီယက်နမ်၊အန္နယန်းပြည်နယ်ရှိ ကမ်တောင်ထိပ်ပေါ်တွင် တိမ်ပင်လယ်များအလယ်၌ ဈေးဝယ်နိုင်မည့် ထူးခြားသော တိမ်ဈေးပွဲတော် ကျင်းပ

ဗီယက်နမ်နိုင်ငံတောင်ပိုင်း မဲခေါင်မြစ်ဝကျွန်းပေါ်ဒေသ၏ အမြင့်ဆုံးတောင်ဖြစ်သော အန္နယန်း (An Giang) ပြည်နယ်ရှိ ကမ်တောင် (Cam Mountain / Nui Cam) တောင်ထိပ်ပေါ်တွင် သဘာဝတိမ်မြူများနှင့် လှပနေသည့် ထူးခြားသော "တိမ်ဈေး" (Cloud Market) သို့ ကမ္ဘာလှည့်ခရီးသွားများ အများအပြား လာရောက်လည်ပတ်လျက် ရှိသည်။

ပင်လယ်ရေမျက်နှာပြင်အထက် မီတာ ၇၀၀ ကျော်အမြင့်တွင် တည်ရှိပြီး မေတ္တာဗုဒ္ဓရုပ်ပွားတော်မြတ်ကြီး (Maitreya Buddha Statue) နှင့် သွေလင်းရေကန် (Thuy Liem Lake) အနီးတွင် ဖွင့်လှစ်ထားသော ဤဈေးသည် နံနက်အစောပိုင်းအချိန်များတွင် တိမ်ပင်လယ်ကြီးများအလယ်၌ မြူပိတ်နေတတ်သဖြင့် ဆန်းပြားသော ရှုခင်းကို ခံစားရစေသည်။ ဈေးအတွင်း၌ ဒေသခံ ခမာ (Khmer) တိုင်းရင်းသူများက ကမ်တောင်ထွက် သဘာဝစတော်ဘယ်ရီသီးများ၊ ဒူးရင်းသီး၊ မင်းကွတ်သီး၊ တောဝါးမျှစ်များနှင့် ဒေသထွက်တိုင်းရင်းဆေးပင်များကို လတ်ဆတ်စွာ ရောင်းချပေးနေကြသည်။

ထို့အပြင် လာရောက်သူများသည် တောင်ပေါ်ရိုးရာအစားအစာတစ်မျိုးဖြစ်သည့် ဆေးဖက်ဝင်တောဟင်းသီးဟင်းရွက်များနှင့် တွဲဖက်စားရသော ဗီယက်နမ်ပန်ကိတ် (Banh Xeo) ကို မြိန်ရှက်စွာ မြည်းစမ်းနိုင်ကြသည်။ အဆိုပါ တိမ်ဈေးသည် နှစ်စဉ် ဇူလိုင်လမှ စက်တင်ဘာလအထိ ရာသီဥတုအေးမြပြီး တိမ်ပင်လယ်အထူထပ်ဆုံး ရာသီဖြစ်၍ ခရီးသွားလာရန် အလှပဆုံးအချိန်ဖြစ်ကြောင်း သိရသည်။